«Qazaqstandy halıfatqa aınaldyrǵysy kelgenderdiń isin qaraý bastaldy» - baspasózge sholý
***
Búginde Qazaqstanda 188 myńǵa jýyq fermerlik sharýashylyqtar jumys isteıdi. Byltyr olar óz tutynýshylaryna 12514 myń tonna dándi daqyl, 2126 myń tonna kartop ónimderin usynǵan. Buǵan jeke menshik úı sharýashylyǵynan basqa maldyń 70-80 paıyzy olarǵa tıesili ekenin eskersek, aýylsharýashylyq ónimderin qaıta óńdeýde, saýdada fermerlik pen shaǵyn jáne orta bıznesti órkendetý ózekti mindet bolyp qala beretini anyq. Alaıda, bul salada áli kúnge deıin sheshimin tappaǵan túıtkildi máseleler jeterlik. El ekonomıkasynyń damýyna laıyqty úles qosýdy alǵy maqsat sanaǵanymen, aýylsharýashylyq taýar óndirýshileriniń bul oıy úlken qıyndyqtarmen júzege asyp kele jatqany jasyryn emes. Bul jaıynda «Egemen Qazaqstan» gazetiniń búgingi sanyndaǵy «Qashanǵy ógeıdiń kúıin keshedi?» degen taqyrypta keńinen baıandalǵan.
Osy basylymnyń búgingi sanynda Din isteri agenttigi dinı oqý oryndarymen baılanys jáne dintaný saraptamasy basqarmasynyń bastyǵy Aınur Ábdirásilqyzymen aradaǵy suhbat «Qazaq qazba baılyqqa ǵana emes, jazba baılyqqa da baı» degen taqyryppen berilgen. Basylym tilshisiniń barlyq saýalyna tuşymdy jaýap bergen ol: «Materıaldyq mádenıettiń kúıreýge beıim ekenin dana babalarymyz ejelden-aq jaqsy bilgen. Sondyqtan qashanda rýhanı álemin kemeldendirýge kúsh salǵan. Pánı tirshilikten jıǵan-tergen barsha danalyǵyn, taǵylym-tájirıbesin, tarıhyn, ádebıetin halqymyz ańyz-áńgimelerge, jyr-dastandarǵa, maqal-mátelderge, shejirelerge, án-kúıge, jer men sýdyń, taý men tastyń atyna aınaldyryp, urpaqqa jetkizýge tyrysqan. Beıneli túrde aıtsaq, ańyzdardyń shyndyqqa qaraǵanda ǵumyry uzaq bolatynyn babalarymyz qaltqysyz paıymdaǵan. Sondyqtan qazaq dalasy abyzdar men ańyzdar eline aınalǵan», - deıdi.
***
«Alash aınasy» gazetiniń jazýynsha, Astana qalasynyń mamandandyrylǵan aýdanaralyq soty keshe «terrorıstik aktilerdi júzege asyrmaq boldy» dep aıyp taǵylǵan kúdiktilerdiń isin qaraýǵa kiristi. Alty adamnan turatyn topqa taǵylǵan basty aıyp: qoǵamǵa qaýip tóndirip, halyqtyń úreıin alý maqsatynda jarylǵysh zattar men qarý qoldana otyryp jarylystar ázirlep, basqa da áreketterdi josparlaý. Kúdiktiler terrorlyq toptarǵa qatysyp, dúrkin-dúrkin lańkestik áreketterdi júzege asyrý arqyly Qazaqstandy halıfatqa aınaldyrýdy da kóksegenge uqsaıdy. «Aqparat agenttikteriniń jazýynan baıqaǵanymyz, kil qarakózderimizden turatyn kúdiktiler lańkestik áreketke bastan-aıaq ázirlengen syńaıly. Máselen jarylys jasaýǵa bel býǵan top elordadaǵy Beıbitshilik pen kelisim saraıynyń, Astana opera jáne balet teatrynyń syzbalaryn qolǵa túsirgen», - dep jazady basylym. Maqala «Qazaqstandy halıfatqa aınaldyrǵysy kelgenderdiń isin qaraý bastaldy» degen taqyryppen berilgen.
«Qazaqstandaǵy 11 mıllıonynshy qazaq qaımaǵy buzylmaǵan ońtústik óńirinde dúnıege keldi. Keshe 5-shi shaqyrylǵan Ońtústik Qazaqstan oblystyq máslıhatynyń kezekten tys 13-inshi sessııasynda sóz alǵan Ońtústik Qazaqstan oblysynyń ákimi Asqar Myrzahmetov jınalǵan qaýymǵa osyndaı qýanyshty habar jetkizdi», - dep jazady «Alash aınasy» gazeti búgingi sanyndaǵy «Az emespiz, 11 mıllıon qazaqpyz!» atty maqalasynda. Basylymnyń atap ótýinshe, bul súıinshi habardy óńir basshysyna QR Statıstıka agenttiginiń tóraǵasy Álıhan Smaıylov telefon shalyp habarlaǵan.
***
Ǵalamda altynmen aptalyp, kúmispen qaptalǵan, gaýhar tastarmen órnektelip, almastan jasalǵan eskiden qalǵan áshekeıler kóp. Sonyń ishinde erekshe mánge ıe jádigerler de bar. Máselen, qazaq jerinen tabylǵan «Altyn adam» jaı ǵana jádiger emes, ol - ult sımvoly ispetti. Ondaǵy árbir altyn bólshegindegi oıýly órnekterdiń ózindik tereń máni bar. Dál osylaısha ár ulttyń sımvolyna aınalyp úlgergen jaýharlar men áshekeı túrleri álemde kóp bolǵanymen, birazy alypsatarlardyń qolyna túsip, joǵalyp ketken. Solaısha keıbir elder qundy murasyn qoldan shyǵaryp alǵanǵa uqsaıdy. Bul jaıynda tereńirek maǵlumat alǵyńyz kelse «Aıqyn» gazetindegi «Joǵalǵan jaýharlar» degen taqyryptaǵy maqalaǵa nazar aýdaryńyz.
