Qazaqstandy gazdandyrý deńgeıi 2030 jylǵa qaraı 56 paıyzdy quraıtyn bolady - B.Jaqsalıev
«Álemdik qarjy daǵdarysyna qaramastan, Qazaqstannyń ekonomıkasy damý ústinde. Al onyń barlyq sektorlarynyń damý negizderiniń biri - elimizdiń energetıkalyq júıesi. Ótken jyly Qazaqstanda munaı eksportynyń kólemi 62,4 mln. tonna bolsa, gaz óndirý 43,2 mlrd. tekshe metrdi qurady. Elimiz aýmaǵy arqyly ótetin halyqaralyq gaz tranzıti 91,4 mlrd. tekshe metrdi qurady. Ótken jyly Qazaqstanda gazdandyrýdy damytýdyń bas kestesi ázirlengen bolatyn. Soǵan sáıkes, 2030 jylǵa qaraı, onyń deńgeıi 56 paıyzǵa jetedi nemese 1,6 myń eldi meken gazmen qamtamasyz etiledi. Al tutyný deńgeıi 18 mlrd. tekshe metrdi quraıtyn bolady», - dedi B.Jaqsalıev.
Sonymen qatar energetıka vıtse-mınıstri tipti kómirsýtekterdiń, metall jáne basqa da bırjalyq taýarlardyń álemdik baǵasy tómendep ketetin bolsa da, «Nurly jol» memlekettik baǵdarlamasy aıasynda elektr jelilerin salý qurylystarynyń, energııa óndiretin uıymdar men ulttyq elektr jelilerin jańartý jumystarynyń jalǵasa beretindigin jetkizdi. «Jańǵyrtylmaly qýat kózderin damytý boıynsha mindetterdi júzege asyrý jáne olardyń úles salmaǵyn 2020 jylǵa qaraı 3 paıyzǵa jetkizý maqsatynda bıyl 23 nysandy, solardyń ishinde 8 kún elektr stansasyn iske qosý josparlanǵan. Olardyń barlyǵynyń jalpy qýaty 432 megavatty quraıdy», - dedi B.Jaqsalıev.
Budan basqa, bolashaǵy bar jobalardyń ishinen ol kómir qyrtystarynan metan gazyn óndirý jobasyn atap ótti. Bul óndiris elimizdiń birqatar óńirleriniń áleýmettik-ekonomıkalyq jaǵdaıyn jaqsartýǵa, Astana qalasyn gazdandyrý máselesin sheshýge, kómir óndirý barysynda jumys qaýipsizdigin arttyrýǵa jáne ekologııalyq ahýaldy jaqsartýǵa múmkindik beredi.
