Qazaqstandy demalys kúnderi jańbyr men ekpindi jel kútip tur
ASTANA. QazAqparat - Sınoptıkter 22-24 sáýir kúnderi elimizde jaýyn-shashyn túsip, aýa temperatýrasy klımattyq normadan joǵary bolady dep boljaýda.
Bul týraly «Qazgıdromet» RMK baspasóz qyzmeti habarlady.
Respýblıkanyń kóptegen oblystarynda demalys kúnderi jańbyr jaýyp, soltústik óńirlerde ylǵaldy qar, keı jerlerde naızaǵaı túsip, jyldamdyǵy 15-25 m/s jel turýy yqtımal.
Sınoptıkterdiń deregi boıynsha, mundaı aýa raıy Qara teńizden respýblıkanyń aýmaǵyna birinen keıin biri keletin tsıklonǵa baılanysty bolyp otyr. Sondyqtan, aýa temperatýrasy jaýyn-shashynǵa qaramastan, burynǵysha joǵary bolyp qalady.
Astanada 21 sáýir kúni kún jartylaı bultty, kúndiz jaýyn-shashyn bolýy múmkin. Ońtústik-shyǵystan soǵatyn jeldiń jyldamdyǵy 9-14 m/s-qa jetedi. Túnde temperatýra +8+10°S, kúndiz +20+22°S.
22 sáýir kúni kún jartylaı bultty bolyp, túnde jańbyr jaýady. Ońtústik-shyǵys jeli soltústik-batysqa qaraı aýysyp, jyldamdyǵy 9-14 m/s-ti quraıdy. Túnde temperatýra +6+8°S, kúndiz +13+15°S jyly bolady.
23 sáýir kúni kún jartylaı bultty, kúndiz jańbyr túsýi yqtımal. Ońtústik-shyǵys jeli ońtústik-batysqa aýysyp, onyń ekpini 9-14, kúndiz 18 m/s-qa jetedi. Túnde aýa temperatýrasy +3+5°S, kúndiz +16+18°S jyly bolady dep kútilýde.
