Qazaqstandy 1 myńnan astam bosqyn panalap otyr – mınıstrlik

ASTANA. QazAqparat – QR Eńbek jáne halyqty áleýmettik qorǵaý mınıstrligi kóshi-qon komıteti tóraǵasynyń mindetin atqarýshy Іlııas Ispanov Qazaqstanǵa pana izdep kelgen bosqyndar týraly málimet berdi, dep habarlaıdy QazAqparat tilshisi.

«Qazirgi geosaıası jaǵdaıǵa baılanysty keıbir memlekette azamattar elden ketýge májbúr bop jatyr. Bul problema bizdiń eldi de aınalyp ótken joq. Qazirgi ýaqytta elimizde 500-ge jýyq bosqyn jáne pana izdep kelgen 722 adam tirkelgen», - dedi Іlııas Ispanov ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, olarmen júrgizetin jumysty BUU standarttaryna sáıkestendirý kerek.

«Qazir bosqyndarmen jumysty bizdiń komıtet úılestirip otyr. Jergilikti atqarýshy organdarmen jáne ishki ister organdarymen birge bul jumysty jalǵastyramyz. Eń bastysy – olardyń elge kelip turýyn zańdastyrý, olardy shettetpesten ómir súrý, óz elindegi jaǵdaı durystalǵan soń qaıtarý máselesin qolǵa alamyz», - dedi І. Ispanov.

Atalǵan azamattardyń ishinen basym bóligi Aýǵanstan (415 bosqyn) men Ýkraınadan (537 pana izdep kelýshi) kelgen.

Bosqyndar men pana izdep kelgen adamdardyń negizgi bóligi Almaty qalasynda (343 bosqyn, 193 PІK), Shymkentte (81 bosqyn, 48 PІK), Almaty oblysynda (11 bosqyn, 58 PІK) jáne Astanada (98 PІK) júr.

Buǵan deıin Іlııas Ispanov Qazaqstan aýmaǵynda júrgen reseılikter týraly málimet bergen edi.