Qazaqstandyqtarǵa jalyndy sálem joldaımyn – Samǵar Serikuly
ıABÝLI. KAZINFORM – Shańǵy tebýden Qytaı quramasynyń sportshysy, ІH qysqy Azııa oıyndarynyń júldegeri, Qytaıda týyp-ósken qandasymyz Samǵar Serikuly Kazinform tilshisine shaǵyn suhbat berdi.

Sportshy bul dodada qazaqstandyq jankúıerlerdiń qoldaýyn sezingenin aıtty.
– Meni qoldap-qýattap jatqandaryńyzdy estip jatyrmyn, óte qýanyshtymyn. Kóp-kóp rahmet aıtqym keledi, barlyqtaryńyzǵa jalyndy sálem, - dedi ol.
Sonymen qatar qandasymyz júldeden keıingi áserimen bólisti.
– Bul – alǵashqy halqaralyq dodada jeńip alǵan júldem. Sol úshin men úshin onyń máni óte zor. Óz elimde júldege qol jetkizgenime qýanyshtymyn, - deıdi Samǵar.
Ol endigi kezekte Olımpıadaǵa joldama alýdy josparlap otyrǵanyn tilge tıek etti.
– Alda taǵy el birinshiligi bar. Sosyn basty nazarda – Mılan Olımpıadasy. Joldama alýǵa bar kúshimdi salyp, jaqsy nátıje kórsetýge tyrysamyn, - dedi qandasymyz.
Aıta keteıik, Samǵar Serikuly Harbın qysqy Azıa oıyndarynda erler arasynda shańǵymen syrǵanaýdan sprınt baǵdarlamasynda óner kórsetip, 2 mınýt 58.51 sekýnd nátıjemen qola medal enshiledi.
Samǵar Serikuly 2005 jyly 10 qańtar Qytaıdyń soltústik-batysyndaǵy Shyńjań Uıǵyr avtonomııalyq ólkesi Altaı aımaǵy Altaı qalasynda dúnıege kelgen. Ol 2023 jyly el chempıonatynda kózge túsip, 2024 jyly Shyńjań quramasy sapynda Qytaı qysqy sport spartakıadasynyń chempıony atanǵan.
Buǵan deıin habarlaǵanymyzdaı, Qytaı quramasynyń sapynda ulty qazaq 4 sportshy IX qysqy Azııa oıyndaryna qatysyp jatyr. Olar: Aqnar Adaqqyzy (konkımen júgirý), Qanaǵat Muhameduly (konkımen júgirý), Baıan Jalynqyzy (shańǵy) jáne Samǵar Serikuly (shańǵy).