Qazaqstandyqtarǵa jalǵan habarlamalarǵa qatysty eskertý jasaldy
ASTANA. KAZINFORM — «Ulttyq aqparattyq tehnologııalar» AQ resmı aıyppul nemese ózge de memlekettik qyzmetter boıynsha habarlamalarda bógde siltemelerge ótý jáne tólem derekterin engizý talap etilmeıtinin eskertedi.
Sońǵy ýaqytta eGov.kz resmı servısteri atynan jiberiletin jalǵan habarlamalar, qońyraýlar men túrli habarlandyrýlardyń taralý derekteri jıilep otyr.
«Ulttyq aqparattyq tehnologııalar» AQ resmı aıyppul nemese ózge de memlekettik qyzmetter boıynsha habarlamalarda bógde siltemelerge ótý jáne tólem derekterin engizý talap etilmeıtinin eskertedi.
Ákimshilik aıyppuldy tekserý jáne tóleý tek resmı memlekettik servıster arqyly júzege asyrylady.
— Qazaqstan Respýblıkasynyń elektrondyq úkimet ınfraqurylymy aqparattyq qaýipsizdik talaptaryna tolyq sáıkes keledi jáne paıdalanýshylardyń derekterin qorǵaýdy qamtamasyz etedi. Derekterdiń jarııa bolýy tek olardy paıdalanýshynyń ózi bógde resýrstarda engizgen jaǵdaıda ǵana múmkin, — delingen habarlamada.
Qosymsha habarlaımyz, memlekettik aqparattyq resýrstar tek resmı domenderde ǵana jumys isteıdi. Atap aıtqanda, elektrondyq úkimet portaly egov.kz mekenjaıy boıynsha qoljetimdi. Kez kelgen derekterdi engizer aldynda braýzerdegi saıttyń mekenjaıyn muqııat tekserý qajet, óıtkeni alaıaqtar uqsas domen ataýlaryn paıdalanýy múmkin.
Aıta ketelik SMS-blaster arqyly alaıaqtyq jasaǵan qylmystyq top ustalǵan edi.
