Qazaqstandyqtarǵa Wildberries pen «Kaspıden» 46 mln teńge qaıtaryp alǵan
ASTANA. KAZINFORM – Tutynýshylardyń quqyǵyn qorǵaý komıteti Baqylaý jáne úılestirý basqarmasynyń bas sarapshysy Meıirjan Amanjolov tutynýshylardan túsetin aryz-shaǵymnyń 15 paıyzy elektrondy saýdamen baılanysty ekenin aıtady.
«Ótken jyldyń qorytyndysy boıynsha mınıstrlikke elektrondyq saýdadaǵy tutynýshylardyń quqyqtaryn buzý bóliginde 7 732 shaǵym kelip tústi. Bul 2022 jylmen alystyrǵanda 290% kóp – bir jyl buryn 2 663 shaǵym túsken edi. Basqasha aıtsaq, komıtetke túsken 50 573 ótinishtiń 15,2%-y osy elektrondy saýdaǵa baılanysty», - deıdi
Onyń sózine qaraǵanda, Instagram, WhatsApp, Facebook, Telegram sııaqty áleýmettik jeli quraldary arqyly tapsyrys berip aldanǵan tutynýshylardan 4254 shaǵym túsken. Bul búkil shaǵymnyń 55%-y degen sóz.
«Mechta, Sulpak, TechnoDom sııaqty saýda jelileriniń ınternet saıttary arqyly saýda jasaǵan qazaqstandyqdtardan 2631 shaǵym kelgen. Bul búkil shaǵymnyń 34%-y jáne aýmaqtyq departamentter onyń bárin shaǵymdanýshynyń paıdasyna sheshti. Al marketpleıster arqyly saýda jasaýshylardan 847 aryz-shaǵym túsken. Bul búkil shaǵymnyń 11%-y, tıisti quzyretti organ bul shaǵymdardy da qanaǵattandyrdy», - deıdi Meıirjan Amanjolov.
Sarapshy atalǵan shaǵymdar ásirese taýardy satýshy tarap pen taýar jaıly aqparattyń joqtyǵyna, taýardyń jarnamadaǵy sıpatyna saı bolmaǵanyna, ınternet-saıttardyń taýardy qaıtarýdan jáne aıyrbastaýdan bas tartýyna jıi shaǵymdanatynyn aıtady.
«Marketpleıs ókilderiniń ústinen túsken 847 ótinim túgel qarastyrylyp, 46 mln teńgeden astam qarajat qaıtaryldy. Onyń ishinde, Wildberries – 32 mln teńgeni, «Kaspı» – 14 mln teńgeni tutynýshylarǵa qaıtardy. Qoldanystaǵy zańda onlaın satýshylardyń jaýapkershiligin kózdeıtin normalar joq. Osyǵan baılanysty, Parlament Májilisine engizilgen jańa zań jobasynda elektrondyq saýda alańdarynyń ıelerin kásipkerlermen tutynýshylardyń quqyqtaryn qorǵaý týraly zańnamanyń talaptaryn saqtaý jóninde sharttar jasasýǵa mindetteý qarastyrylǵan. Bul shartty oryndamaý, ákimshilik jáne azamattyq-quqyqtyq jaýapkershilik qana emes, sonymen qatar elektrondyq platformada saýda jasaý múmkinshiliginen aıyrylady», - deıdi komıtet ókili.
