Qazaqstandyqtarǵa Ulttyq qordan 8 mıllıon dollar tólendi
ASTANA. KAZINFORM — «BJZQ» AQ «Ulttyq qor - balalarǵa» baǵdarlamasynyń qatysýshylaryna 8 mln asa AQSh dollaryn aýdardy. Bul týraly BJZQ baspasóz qyzmeti habarlady.
— 2025 jylǵy 1 naýryzdaǵy jaǵdaı boıynsha «Ulttyq qor — balalarǵa» baǵdarlamasy iske qosylǵan 2024 jyldyń 1 aqpanynan bastap «BJZQ» AQ 8 mln asa AQSh dollaryna 75 329 ótinish oryndady (ótinish berýshilerdiń banktik shottaryna aýdarý úshin ýákiletti operatorlarǵa aýdaryldy). Onyń ishinde turǵyn úı jaǵdaılaryn jaqsartý maqsatynda 4,65 mln astam AQSh dollaryna 43 781 ótinish, bilim alý aqysyn tóleý úshin shamamen 3,35 mln AQSh dollaryna 31 548 ótinish oryndaldy. Esterińizge sala keteıik, nysanaly jınaqtardy alýshy barlyq somany nemese onyń bir bóligin paıdalanýǵa quqyly, aqshanyń paıdalanylmaǵan qaldyǵy nysanaly jınaqtaý shotynda qala beredi, — delingen BJZQ habarlamasynda.
Turǵyn úı jaǵdaılaryn jaqsartý aıasynda qazaqstandyqtar qarjylaryn kóbinese mynadaı maqsatta paıdalandy:
odan ári jınaqtaý úshin turǵyn úı qurylysy jınaqtaryndaǵy salymdy tolyqtyrý (4,53 mln asa AQSh dollaryna 42 622 ótinish oryndaldy),
turǵyn úı satyp alýǵa ıpotekalyq turǵyn úı qaryzyn alý úshin bastapqy jarnany engizý — 37,44 myńnan asa AQSh dollaryna 362 ótinish,
azamattyq-quqyqtyq mámileler boıynsha menshikke turǵyn úı satyp alý (túpkilikti esep aıyrysý) — 32,81 myńnan asa AQSh dollaryna 325 ótinish.
Bilim alý aqysyn tóleý boıynsha eń tanymal qosalqy maqsattar:
Qazaqstan Respýblıkasynyń aýmaǵynda ornalasqan bilim uıymdarynyń bilim berý qyzmetterine úlestermen (árbir akademııalyq kezeń nemese oqý jyly úshin) nemese bir ret tolyq kólemde (búkil oqý merzimi úshin) aqy tóleý (2,88 mln asa AQSh dollaryna 27 020 ótinish oryndaldy),
bilim alý úshin jınaqtaý salymy týraly shart boıynsha bilim alý jınaqtaý salymyn tolyqtyrý (354,24 myńnan asa AQSh dollaryna 3 421 ótinish oryndaldy),
sheteldik bilim berý uıymdarynyń oqytý qyzmetterine úlestermen (árbir akademııalyq kezeń nemese oqý jyly úshin) nemese tolyq kólemde birjolǵy (búkil oqý merzimi úshin) aqy tóleý (99,78 myńnan asa AQSh dollaryna 971 ótinish oryndaldy).