Qazaqstandyqtarǵa smartfondy resmı tirkeýge eki aı ýaqyt berildi
ASTANA. KAZINFORM — Elimizde mobıldi telefondardy mindetti tirkeý 2025 jyldyń 26 mamyryna deıin uzartyldy. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstrligi habarlaıdy.
Eske salsaq, 2025 jyldyń 25 naýryzynan bastap, Qazaqstanǵa ákelingen barlyq mobıldi qurylǵy GSMA halyqaralyq bazasynda jáne memlekettik júıede mindetti verıfıkatsııadan ótýi tıis bolatyn.
— Bıznes ókilderimen birneshe kezdesý ótkizilgennen keıin qosymsha 60 kún ýaqyt berý týraly sheshim qabyldandy. Bul ımporttaýshylar men satýshylarǵa buryn ákelingen, biraq áli satylmaǵan qurylǵylardy tirkeýge múmkindik beredi. Osylaısha, bızneske barlyq mobıldi qurylǵyny tirkeý úshin taǵy eki aı beriledi. Qurylǵylardy https://kz-imei.kz/ portalynda zańdastyrý qajet. Verıfıkatsııadan ótýge 60 kún beriledi. 2025 jyldyń 26 mamyrynan bastap zańdastyrylmaǵan qurylǵylar mobıldi baılanysqa qosylý múmkindiginen shekteledi, — delingen habarlamada.
Sonymen qatar, mınıstrlik jańa erejeler tek ózgerister kúshine engennen keıin elge ákelingen qurylǵylarǵa qatysty ekenin eskertedi. Qazaqstanda qazir jumys istep turǵan barlyq mobıldi telefon avtomatty túrde «aq» tizimge engiziledi jáne shekteýsiz jumysyn isteıdi.
Eske sala ketsek, jyl basynda elimizde abonenttik qurylǵylardyń «aq», «sur» jáne «qara» tizimi paıda bolatyny týraly habarlaǵan bolatynbyz.
Aıta keteıik, smartfondardy tirkeýdiń jańa erejesiniń bıyl 24 naýryzǵa deıin satyp alynǵan abonenttik uıaly baılanys qurylǵylaryna esh qatysy bolmaıdy.
Sondaı-aq smartfondardy tirkeýdiń jańa erejesi qurylǵylardyń qymbattaýyna áseri týraly jazǵan edik.
Jyl basynda Májilis depýtaty Qazaqstanǵa zańsyz ákelingen jáne tirkelmegen smartfondardy buǵattaýdy usyndy.