Qazaqstandyqtarǵa skrınıng pen ekpe týraly 1414 arqyly habarlanady
ASTANA. KAZINFORM — 19 qazannan bastap Qazaqstannyń úsh óńirinde azamattarǵa skrınıngten ótý qajettigi týraly SMS-eskertýler jiberiledi. Al 26 qazannan bastap elimizdiń barlyq óńirinde salynǵan ekpeler týraly habarlamalar taratylady.
Densaýlyq saqtaý mınıstrliginiń habarlaýynsha, pılottyq joba 19 qazannan bastap Aqmola, Abaı jáne Ulytaý oblystarynda iske qosylady. 1414 biryńǵaı baılanys ortalyǵy arqyly azamattarǵa profılaktıkalyq tekserýden ótý qajettigi týraly jeke SMS-habarlamalar jiberiledi.
Júıe júrek-qantamyr jáne onkologııalyq aýrýlardy, qant dıabetin, mı qanaınalymynyń buzylýyn jáne vırýstyq gepatıtterdi erte anyqtaýǵa arnalǵan alty baǵyt boıynsha tekserýden ótýi qajet azamattardy avtomatty túrde anyqtaıdy.
Habarlama alǵan azamat ózi tirkelgen emhanaǵa baryp, skrınıngten óte alady.
— 26 qazannan bastap elimizdiń barlyq óńirinde azamattarǵa salynǵan vaktsınalar týraly SMS-habarlamalar jiberý josparlanyp otyr. Ekpe medıtsınalyq aqparattyq júıede tirkelgennen keıin azamatqa nemese balanyń zańdy ókiline vaktsınanyń ataýy men egilgen kúni kórsetilgen habarlama keledi, — delingen habarlamada.
Eger SMS-tegi málimetter shyndyqqa sáıkes kelmese, azamat 1414 nómirine jaýap habarlama jiberip, bul týraly habarlaı alady. Túsken aqparat tekserý úshin Sanıtarııalyq-epıdemıologııalyq baqylaý komıtetine joldanady.
Densaýlyq saqtaý mınıstrligi medıtsınalyq qyzmetterdiń shynymen kórsetilgenin rastaýǵa múmkindik beretin patsıentterdi tsıfrlyq sáıkestendirý júıesin de keńeıtip jatyr.
2026 jylǵy 7 qazandaǵy jaǵdaı boıynsha tirkelgen 135,9 mln qabyldaýdyń 73%-y tsıfrlyq sáıkestendirýden ótken.
Qazir júıe medıtsınalyq qyzmettiń 1 278 túrin qamtıdy. Al 1 jeltoqsannan bastap tizimge konsýltatsııalardyń, dıagnostıkalyq zertteýler men medıtsınalyq emsharalardyń taǵy 736 túrin qosý josparlanǵan.
Eske salaıyq, buǵan deıin Qazaqstanda ókpe obyryn erte anyqtaıtyn jańa skrınıng iske qosylǵanyn jazǵanbyz.
