Qazaqstandyqtarǵa shetelde qıyn jaǵdaıǵa tap bolǵan kezde kim kómektesedi
ASTANA. KAZINFORM - Byltyr 31 jeltoqsanda Syrtqy ister mınıstriniń buıryǵymen respýblıkalyq bıýdjette kózdelgen «Qazaqstan Respýblıkasynyń sheteldegi múddelerin bildirý» baǵdarlamasy boıynsha qarajatty paıdalaný qaǵıdalaryna ózgeris engizildi.
Atap aıtqanda, qujat ataýy «Fors-majorlyq jaǵdaılardy qosa alǵanda, qıyn jaǵdaıǵa tap bolǵan Qazaqstan Respýblıkasynyń azamattarynyń quqyqtary men múddelerin qorǵaý jónindegi is-sharalardy iske asyrý qaǵıdalary, sondaı-aq bolǵan memlekette qaıtys bolǵan Qazaqstan azamattaryna qatysty sharalar qabyldaý qaǵıdalary» dep ózgertildi.
Sonymen qatar qaǵıdalardyń ózi jańa redaktsııada baıandaldy.
Osy qaǵıdalarda qıyn jaǵdaı dep kelesi jaıttarǵa baılanysty týyndaǵan jaǵdaılar esepteledi:
- Fors-majorlyq ahýaldarǵa oraı paıda bolǵan jaǵdaılar (eńserilmeıtin kúsh, ıaǵnı osy jaǵdaılar kezinde tótenshe jáne aldyn alýǵa bolmaıtyn mán-jaılar, onyń ishinde bolý memleketindegi dúleı qubylystar, áskerı is-qımyldar, tótenshe jaǵdaı);
- Qazaqstan Respýblıkasynyń azamattaryn shet memleketke zańsyz ákelý;
- Qazaqstan Respýblıkasyna qarsy baǵyttalǵan quqyqqa qaıshy is-áreketter;
- Qazaqstan Respýblıkasynyń azamattary shetelde osy Qaǵıdalardyń 10-tarmaǵynyń 5) tarmaqshasynda kózdelgennen tys jaǵdaılarda qaıtys bolsa.
Qarjylaı kómektiń túrlerine tómendegi shyǵystar jatady:
- Shet memleketten Qazaqstan Respýblıkasyna deıingi kólik shyǵystaryn tóleý (ekonomklasty áýe bıletiniń qunynan aspaıdy);
- Bir jolǵy materıaldyq kómek:
tamaqtaný (Qazaqstan azamatyna kúnine 80 AQSh dollaryna balamaly somadan aspaıdy) 3 táýlikten artyq emes;
turý (kúnine 100 AQSh dollaryna balamaly somadan aspaıdy) 3 táýlikten artyq emes;
birinshi qajettiliktegi zattar bolmaǵan jaǵdaıda olardy satyp alý (280 AQSh dollaryna balamaly somadan aspaıdy).
- Júkti jóneltý, Qazaqstan Respýblıkasynyń qaıtys bolǵan azamatynyń denesin (qaıtys bolǵandardyń kúli salynǵan caýyttar men tabyttardy) elge tasymaldaý, balzamdaý, máıithanada deneni saqtaý, bolǵan memleketinde jerleý nemese krematsııalaý jónindegi qyzmetterge aqy tóleýdi qamtıdy.
- Qarjylyq kómek kórsetý qıyn jaǵdaıda qalǵan Qazaqstan azamaty aqsha qarajatyn paıdalanbaǵan nemese paıdalana almaǵan jaǵdaıda osy qaǵıdalarǵa sáıkes júzege asyrylady.
Sonymen qatar atalǵan qujatqa sáıkes, elimizdiń azamattaryna shetelde qıyn jaǵdaıǵa tap bolǵan kezde qarjylaı kómek Syrtqy ister mınıstrligi men onyń sheteldegi mekemeleri arqyly ótinish negizinde kórsetiledi. Jaǵdaı men qujattar tekseriledi, zań buzý nemese ózge de negizder bolǵan jaǵdaıda kómek kórsetilmeıdi. Al qarjylaı kómek qaıtarymsyz túrde qolma-qol nemese aqsha aýdarý arqyly beriledi. Osyǵan baılanysty tolyq aqparatty silteme arqyly oqı alasyz.
Atalǵan buıryq 2026 jylǵy 16 qańtardan bastap qoldanysqa engiziledi.
Eske sala keteıik, Qazaqstan postkeńestik keńistikte sanıtarlyq avıatsııa júıesi damyp kele jatqan sanaýly ǵana elderdiń bir ekenin jazǵanbyz.