Qazaqstandyqtarǵa onkologııalyq emniń qandaı túrleri tegin kórsetiledi
ASTANA. KAZINFORM – Patsıentterge zamanaýı isikke qarsy 150 túrli dárilik preparat, PET/KT dıagnostıkasy, joǵary tehnologııalyq operatsııalar jáne sáýlelik terapııanyń zamanaýı ádisteri qoljetimdi. Jyl saıyn 55 myńnan astam adam dárilik isikke qarsy terapııa alady.
Qazaqstanda azamattarǵa onkologııalyq aýrýlardy emdeý memleket qarajaty esebinen tegin medıtsınalyq kómektiń kepildik berilgen kólemi sheńberinde júrgiziledi.
— Patsıentterge zamanaýı isikke qarsy 150 túrli dárilik preparat, PET/KT dıagnostıkasy, joǵary tehnologııalyq operatsııalar jáne sáýlelik terapııanyń zamanaýı ádisteri qoljetimdi. Jyl saıyn 55 myńnan astam adam dárilik isikke qarsy terapııa alady.
Búginde elimizde 102 hımıoterapııalyq, 45 targettik jáne 3 ımmýnoonkologııalyq preparat qoldanylady. Medıtsınalyq kórsetilimder bolǵan jaǵdaıda Qazaqstan azamattaryna qajetti dárilik terapııa TMKKK sheńberinde usynylady, — delingen habarlamada.
Naqty preparat pen emdeý shemasyn dáriger dıagnozdy, aýrýdyń satysyn, patsıenttiń jaǵdaıyn jáne isiktiń sıpattamalaryn eskere otyryp, ár patsıentke jeke anyqtaıdy.
— Qazaqstanda 19 PET/KT apparatymen jabdyqtalǵan 10 ıadrolyq medıtsına ortalyǵy jumys isteıdi. Sonymen qatar tórt tsıklotrondyq-óndiristik keshen jáne bir fotondyq emıssııalyq kompıýterlik tomografııa júrgizýge arnalǵan jeti apparat bar.
PET/KT medıtsınalyq kórsetilimder boıynsha taǵaıyndalady. Tekserýge joldamany medıtsınalyq-sanıtarııalyq alǵashqy kómek kórsetetin medıtsınalyq uıym rásimdeıdi, al patsıentterdi marshrýtızatsııalaý respýblıkalyq deńgeıde úılestiriledi.
Qazaqstandyq patsıentterge onkologııalyq aýrýlardy emdeýdiń zamanaýı ádisteri, onyń ishinde targettik jáne ımmýnoonkologııalyq terapııa, joǵary dozaly hımıoterapııa jáne jasýshalyq ımmýnoterapııa qoljetimdi, — delingen DSM habarlamasynda.
Onkologııalyq ortalyqtarda aǵzany saqtaýǵa baǵyttalǵan jáne rekonstrýktıvtik kúrdeli operatsııalar jasalady, az ınvazıvtik jáne robottyq tehnologııalar qoldanylady. Jekelegen baǵyttarda úsh ólshemdi modeldeý jáne jeke daıyndalatyn súıek ımplantattary, neırohırýrgııada navıgatsııalyq júıeler, laparoskopııalyq jáne torakaldyq hırýrgııalyq aralasýlar paıdalanylady.
Elimizde sáýlelik terapııa júrgizýge arnalǵan 40-tan astam apparat, onyń ishinde 26 jelilik údetkish jumys isteıdi. Jyl saıyn shamamen 15 myń patsıent sáýlelik terapııa alady.
2025 jyly Qazaqstanda Ortalyq Azııadaǵy alǵashqy protondyq terapııa ortalyǵy da ashyldy. Onkologııalyq praktıkaǵa sáýlelik emdeýdiń zamanaýı tehnologııalary, onyń ishinde adaptıvtik, tórt ólshemdi jáne stereotaksıkalyq terapııa, sondaı-aq joǵary dozaly brahıterapııa engizildi.
Eger patsıentte tekserý, taǵaıyndalǵan preparattar, emdeý nemese emdeýge jatqyzý boıynsha suraqtar týyndasa, eń aldymen emdeýshi dárigerge nemese bólim meńgerýshisine júginý qajet.
Sondaı-aq patsıent pen onyń jaqyndary ózi em qabyldap jatqan Qazaqstan Respýblıkasy Densaýlyq saqtaý mınıstrliginiń Qazaq onkologııa jáne radıologııa ǵylymı-zertteý ınstıtýtynyń (QazOjRǴZI) nemese onkologııalyq ortalyqtyń patsıentterdi qoldaý qyzmetine júgine alady. Munda medıtsınalyq kómekti uıymdastyrý jáne odan ári emdelý marshrýty boıynsha túsindirme alýǵa bolady.
Ambýlatorııalyq jaǵdaıda barlyq konsýltatsııalar men dıagnostıkalyq is-sharalar jalpy kezekten tys patsıentterge basymdyqpen qyzmet kórsetýdi qamtamasyz etetin «jasyl dáliz» qaǵıdaty boıynsha júzege asyrylady. Qyzmet kórsetý merzimi — on segiz jumys kúnine deıin.
Mamandandyrylǵan medıtsınalyq kómek deńgeıinde onkolog dáriger dıagnozdy morfologııalyq turǵydan verıfıkatsııalaýǵa jáne isik protsesiniń taralý dárejesin anyqtaýǵa baǵyttalǵan dıagnostıkalyq zertteýlerdiń tolyq keshenin júrgizedi.
Qazaqstan azamattaryna onkologııalyq kómek TMKKK sheńberinde tegin kórsetiledi.
Aıta ketelik onkologııada dári-dármek qaýipsizdigin arttyratyn jańa júıe engizilgen edi.
