Qazaqstandyqtarǵa memlekettik organdardyń zańsyz áreketteri úshin ótemaqy alý quqyǵy berilýi múmkin
ASTANA. KAZINFORM — «Ádil sóz» qorynyń basshysy Qarlyǵash Jamanqulova Konstıtýtsııaǵa memleket tarapynan keltirilgen zalaldy óteý týraly normany engizýdi usyndy.
— Memleket pen onyń organdary týraly aıtqanda, eń aldymen kún saıyn adamdardyń taǵdyrymen betpe-bet keletin bılik týraly sóz qozǵaımyz. Qarapaıym adam úshin dál osy memlekettik sheshimder, ruqsattar, tyıymdar, tekserýler nemese formaldy jaýaptar kóbine jumys isteý, bilim alý, emdelý nemese óz menshigin qorǵaý múmkindigin aıqyndaıdy, — dedi Q. Jamanqulova Konstıtýtsııalyq komıssııanyń 8-shi otyrysynda.
Onyń aıtýynsha, memlekettik organdardyń zańsyz áreketteri nemese áreketsizdigi saldarynan keltirilgen zııandy óteý — quqyqtyq memlekettiń jáne quqyqtar men bostandyqtardyń deklaratıvti emes, naqty sıpatta bolýyn kórsetedi.
— Qazaqstandyqtar jarııa bılik organdarynyń qyzmetinen kelgen zalal úshin laıyqty ótemaqy alýy tıis. Eger azamatqa ádiletsizdik jasalsa, ol joǵaltqan ýaqyty, jumsaǵan qarajaty nemese tipti moraldyq zııany úshin ótemaqy alý múmkindigine ıe bolýy kerek, — dedi qor basshysy.
Sonymen birge, mundaı konstıtýtsııalyq kepildik azamattardy qorǵap qana qoımaı, memlekettik organdar men laýazymdy tulǵalar tarapynan zańsyz sheshim qabyldaý men quqyqqa qaıshy áreketter jasaý qaýpin azaıtatyn turaqty aldyn alý áserin de beredi.
— Sot memlekettik organdar men laýazymdy tulǵalardyń sheshimderi nemese áreketteri zańsyz dep tanyǵan jaǵdaıda, azamattarǵa osyndaı ótemaqy alý múmkindigin kepildendirý qajet. Mundaı kepildikti dál Konstıtýtsııa deńgeıinde bekitý Qazaqstannyń árbir azamatynyń sýbektiligin konstıtýtsııalyq deńgeıde moıyndaý bolmaq, — dedi Qarlyǵash Jamanqulova.
Aıta keteıik, jańa Konstıtýtsııa el tarıhynda tuńǵysh ret qazaq tilinde jazylyp jatyr.
Konstıtýtsııalyq sot tóraǵasy Elvıra Ázimova jańa Konstıtýtsııanyń jobasy ári qaraı da qoǵamnyń kóz aldynda, ashyq talqylana beretinin aıtty.