Qazaqstandyqtarǵa kredıt berý: jańa zań jobasyna qandaı ózgerister engizilip jatyr
Parlament Májilisiniń qaraýyna «Qazaqstan Respýblıkasynyń keıbir zańnamalyq aktilerine kredıt berý kezinde táýekelderdi barynsha azaıtý jáne qaryz alýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasy engizildi, dep habarlaıdy Kazinform.
Búgin Májilistiń jalpy otyrysynda depýtat Tatıana Saveleva bul qujat Parlament depýtattarynyń bastamasymen ázirlengenin aıtty.
Zań jobasynda nesıeler boıynsha merzimi ótken bereshegi bolǵan jaǵdaıda azamattarǵa jańa tutynýshylyq nesıeler berýge tyıym salý, 90 kún keshiktirilgennen keıin barlyq nesıe boıynsha paıyzdardy esepteýge tyıym salý, sondaı-aq bankter men mıkroqarjy uıymdarynyń kollektorlyq agenttikterge azamattardyń nesıelerin satýyna shekteý engizý qarastyrylǵan.
Munymen qosa, atalǵan qujatta satyp alǵan qaryzdardy retteýge qatysty kollektorlyq agenttikterdiń mindetin engizý, Qarjy naryǵyn retteý jáne damytý agenttigi normatıvtik-quqyqtyq aktisine sáıkes bank nesıesiniń merzimi men somasyna jáne basqa da talaptaryna shekteý belgileý eskerilgen.
«Jylý berý maýsymynda (kúzde, qysta) kámeletke tolmaǵan balalary bar otbasylardy jalǵyz baspanasynan shyǵarýǵa tyıym salý normasy qarastyrylǵan», - dedi T. Saveleva.
Budan bólek, zań jobasynda áskerı qyzmet ótkerý kezeńinde merzimdi áskerı qyzmetshilerge qaryzdar boıynsha mindetti keıinge qaldyrý talaby engizilgen.
Sonymen qatar zań jobasynda QR Qylmystyq kodeksi men Ákimshilik quqyq buzýshylyq týraly kodeksine túzetýler kózdelgen. Bul rette, jeke derekterdi satý, abonenttik nómirdi aýystyrý jáne abonenttik nómirdi basqa tulǵalarǵa zańsyz bergeni úshin qylmystyq jáne ákimshilik jaýapkershilikti belgileý bóliginde ózgerister bolady.
«Depýtattar bastamashylyq etken zań jobasy boıynsha Úkimettiń qorytyndysy 2023 jylǵy 12 qarashada kelip túsken. Bastamalardyń basym bóligi qoldaý tapty. Sonymen birge, keıbir tujyrymdamalyq ustanymdar boıynsha, ıaǵnı kollektorlyq kompanııalarǵa nesıe satýǵa tyıym salý baǵytynda Úkimet balamaly ustanymyn jarııalady. Onymen depýtattar kelispeı otyr jáne osy normany engizý boıynsha jumys toptarynda jumysyn jalǵastyrady», - dedi depýtat.
