Qazaqstandyqtarǵa Qytaıǵa kirýdiń jańa erejeci týraly eskertildi
ASTANA. KAZINFORM – 15 qyrkúıekten bastap Qytaıda elge kirý jáne shyǵý tártibiniń jańartylǵan erejeleri kúshine enedi. Osyǵan baılanysty qazaqstandyq FlyArystan áýe kompanııasy jolaýshylarǵa áýejaıǵa erterek kelýge keńes berdi, dep habarlaıdy Kazinform tilshisi Beıjińnen.
Áýe kompanııasynyń málimetinshe, jańa talaptarǵa baılanysty ımmıgratsııalyq baqylaýdan ótý kezinde qujattardy tekserý rásimi burynǵydan uzaǵyraq ýaqyt alýy múmkin.
– Qytaıǵa baratyn nemese elden ushyp shyǵatyn jolaýshylarǵa saparǵa qajetti qujattardyń, sonyń ishinde pasporttyń bar-joǵyn jáne jaramdylyq merzimin aldyn ala tekserýdi, sondaı-aq QHR-ǵa kirý men shyǵýdyń qoldanystaǵy talaptarymen tanysýdy usynamyz. Pasporttyq jáne ımmıgratsııalyq baqylaýdan ótýge qosymsha ýaqyt qarastyryp, áýejaıǵa ushýǵa keminde 3 saǵat qalǵanda kelgen jón, – delingen FlyArystan Info habarlamasynda.
Qytaıdyń jańartylǵan «Kirý men shyǵýdy basqarý týraly erejesin» QHR Memlekettik keńesi bıyl 31 shildede qabyldaǵan.
Qujattaǵy ózgerister ımmıgratsııalyq baqylaýdy retke keltirýge, azamattardyń quqyqtaryn qorǵaýǵa jáne ulttyq qaýipsizdikti nyǵaıtýǵa baǵyttalǵan.
Jańa talaptarǵa sáıkes, vıza rásimdeý kezinde nemese shekaralyq baqylaýdan ótý barysynda jalǵan málimet usynǵan sheteldik azamattarǵa Qytaıǵa kirýge 1 jyldan 5 jylǵa deıin tyıym salynýy múmkin.
Aıta keteıik, Qyrǵyzstanǵa janar-jaǵarmaı jetkizetin qytaılyq júrgizýshilerdiń kirý tártibi jeńildetildi.
