Qazaqstandyqtarǵa qant tutynýdy shekteý usynyldy

ASTANA. KAZINFORM – Densaýlyq saqtaý mınıstrligi kúndelikti tamaqtaný ratsıonynda qant mólsherin azaıtýǵa baǵyttalǵan birqatar usynys jarııalady.

Mamandardyń aıtýynsha, eń aldymen tátti sýsyndardy tutynýdy shekteý qajet. Máselen, kólemi 0,5 lıtr bolatyn gazdalǵan sýsynnyń quramynda shamamen 10 shaı qasyq qant bolady.

Sondaı-aq nektar men tátti shyryn sýsyndarynyń ornyna tabıǵı shyryndardy tańdaǵan durys. Degenmen tabıǵı shyryndardyń quramynda da qant bar, sondyqtan olardy kúnine 1-2 staqannan artyq ishpeý usynylady. Eń paıdaly sýsyn – taza aýyz sý.

Mınıstrlik tátti tiskebasarlardan bas tartyp, olardyń ornyna jemis-jıdek, jańǵaq pen dándi daqyldardy tutynýǵa keńes beredi. Keptirilgen jemister men jıdekterdiń qant qosylmaǵan túrin tańdaǵan jón, biraq olardy da aptasyna 2-3 portsııadan artyq qoldanbaý kerek. Bir portsııa shamamen 20 grammǵa nemese eki as qasyqqa teń.

- Tátti ıogýrttar men súzbeli desertterdiń ornyna qospasyz ıogýrt pen súzbeni tańdaǵan durys. Qajet bolsa, oǵan jıdek nemese jemis qosyp, tabıǵı túrde dámdeýge bolady, - delingen aqparatta.

Mamandar táttini múlde toqtatýdyń ornyna ony qunarly ónimdermen birge tutynýǵa keńes beredi. Mysaly, kondıterlik ónim daıyndaǵanda tutas dándi undy paıdalanyp, suly úlpegi, jańǵaq, dán, jemis pen kókónis qosý arqyly qant mólsherin azaıtýǵa bolady.

Keıbir adamdar úshin qanttan birden tolyq bas tartý ońaı bolýy múmkin. Ádette alǵashqy apta eń qıyn kezeń sanalady, keıin dám sezý qabileti az qant mólsherine beıimdeledi.

Dárigerler qantty shamadan tys tutyný semizdikke, qant dıabetine, júrek-qan tamyrlary aýrýlaryna jáne zat almasý buzylystaryna ákeletinin eske salady.

Aıta keteıik, elimizde obyrdy erte anyqtaý men emdeý tıimdiligi artyp keledi.