Qazaqstandyqtarǵa IT meńgerýge 500 myń teńgege deıin vaýcher beriledi
ASTANA. KAZINFORM — Qazaqstanda IT mamandaryn daıarlaýǵa arnalǵan Tech Orda baǵdarlamasyna ótinim qabyldaý bastaldy, dep habarlaıdy JI jáne tsıfrlyq damý mınıstrliginiń baspasóz qyzmeti.
Astana Hub Tech Orda baǵdarlamasynyń besinshi, mereıtoılyq maýsymyna ótinim qabyldaý bastalǵanyn habarlady. Qazaqstannyń 18 ben 45 jas aralyǵyndaǵy azamattary elimizdiń barlyq óńirindegi akkredıttelgen IT-mektepterde oqýǵa arnalǵan vaýcher alyp, eń suranysqa ıe tsıfrlyq mamandyqtardyń birin meńgere alady.
Baǵdarlama aıasynda qatysýshylar oflaın formattaǵy oqý úshin 500 000 teńgege deıin, al onlaın nemese gıbrıdti formattaǵy oqý úshin 400 000 teńgege deıin nomınaldy vaýcher ala alady.
Tech Orda — Jasandy ıntellekt jáne tsıfrlyq damý mınıstrliginiń qoldaýymen júzege asyrylatyn Astana Hub baǵdarlamasy. Ol bilikti IT-mamandardy daıarlaýǵa jáne elimizdegi jeke IT-bilim berý ınfraqurylymyn damytýǵa baǵyttalǵan.
— Tehnologııalar salasyndaǵy adamı kapıtaldy damytý — Qazaqstannyń tsıfrlyq transformatsııasynyń negizgi basymdyqtarynyń biri. Tech Orda baǵdarlamasy qazaqstandyqtarǵa eńbek naryǵynda suranysqa ıe daǵdylardy meńgerýge, al bızneske bilikti kadrlarǵa qol jetkizýge múmkindik beredi. Mundaı baǵdarlamalarǵa suranystyń joǵary ekenin kórip otyrmyz jáne adamdardyń IT salasynda mansap qurýyna ári eldiń ınnovatsııalyq ekonomıkasyn damytýǵa yqpal etetin bastamalardy qoldaýdy jalǵastyramyz, — dedi QR premer-mınıstriniń orynbasary, Jasandy ıntellekt jáne tsıfrlyq damý mınıstri Jaslan Mádıev.
Oqý tsıfrlyq ındýstrııanyń eń suranysqa ıe baǵyttary boıynsha qoljetimdi: jasandy ıntellekt, kıberqaýipsizdik, baǵdarlamalyq qamtamasyz etýdi ázirleý, derekterdi taldaý, Cloud & DevOps, GameDev, ónim menedjmenti, UI/UX-dızaın jáne basqa da mamandyqtar.
Baǵdarlama iske asyrylǵan 2021–2026 jyldar aralyǵynda 12,5 myńnan astam qazaqstandyq bilim aldy. Monıtorıng nátıjeleri boıynsha ekonomıkalyq belsendi túlekterdiń 90%-y jumysqa ornalasqan, al olardyń ortasha jalaqysy 725 myń teńgeni quraıdy, bul eldegi ortasha aılyq jalaqydan shamamen 43%-ǵa joǵary. Sondaı-aq 3,2 myńnan astam adam Tech Orda baǵdarlamasynyń arqasynda mamandyǵyn ózgertip, IT salasynda mansabyn bastady.
Baǵdarlama túlekterin 1 287 kompanııa jumysqa qabyldady. Olardyń qatarynda Kaspi.kz, Halyk Bank, Freedom Finance, Kolesa Group, Kcell, EPAM Kazakhstan, Yandex, Wolt, 2GIS, Deloitte, KPMG, EY jáne Accenture sııaqty jetekshi kompanııalar bar. Baǵdarlamaǵa qatysatyn IT-mektepterdiń 30%-dan astamy óńirlik mektepter, bul elimizdiń barlyq óńirinde sapaly IT-bilimge qoljetimdilikti keńeıtýge múmkindik beredi.
Ótinim qabyldaý 2026 jylǵy 7 qyrkúıekke deıin jalǵasady. Qatysý sharttary, akkredıttelgen mektepterdiń tizimi jáne tirkelý týraly tolyq aqparat Astana Hub platformasynda qoljetimdi. Qosymsha aqparatty tańdaǵan IT-mektepten nemese 1818 nómiri arqyly alýǵa bolady.
Buǵan deıin áskerı IT-mamandar daıarlaıtyn ınstıtýtqa qujat qabyldaý bastalǵanyn jazǵanbyz.
