Qazaqstandyqtarǵa eskertý: jalǵan sot oryndaýshylary kóbeıip barady

ASTANA. KAZINFORM — QR Ádilet mınıstrliginiń Májbúrlep oryndatý komıteti azamattardy alaıaqtardyń zańsyz áreketterine qatysty eskertti. Sońǵy ýaqytta ózin sot oryndaýshysy retinde tanystyryp, mınıstrliktiń emblemasyn zańsyz paıdalanatyn jaǵdaılar jıilegen.

Komıtettiń málimetinshe, alaıaqtar azamattardy bank shottaryn buǵattaý, múlikke tyıym salý sııaqty sharalarmen qorqytyp, «bereshekti» jedel óteýdi talap etedi. Vedomstvo mundaı aıla-tásilderge senbeýge keńes beredi.

Atqarýshylyq is júrgizýdiń bar-joǵyn azamattar óz betinshe teksere alady:

– https://aisoip.adilet.gov.kz saıtyndaǵy «Boryshkerler men tyıym salýlar tizilimi» nemese «Atqarýshylyq qujatty izdeý» bóliminde;
– jeke ETsQ arqyly «Taraptar kabıneti» arqyly;
– «Azamattarǵa arnalǵan» bólimindegi baılanys derekteri arqyly sot oryndaýshysyna tikeleı qońyraý shalý arqyly.

Sonymen qatar aqparatqa «Adilet» mobıldi qosymshasy arqyly da qol jetkizýge bolady.

Qosymsha málimetti Ádilet mınıstrliginiń jáne Jeke sot oryndaýshylarynyń respýblıkalyq palatasynyń resmı saıttarynan alýǵa bolady.

Komıtet tek resmı derekkózderge senýdi, derbes derekterdi úshinshi tulǵalarǵa nemese kúmándi ınternet-resýrstarǵa bermeýdi eskertti.

Quqyqtyq keńesti 119 nómiri boıynsha Sall-ortalyqtan, sondaı-aq 119 Kenesbot telegram-arnasy nemese QR «Ádilet» aqparattyq-quqyqtyq júıesiniń saıtyndaǵy «Vırtýaldy keńesshi» aıdary arqyly alýǵa bolady.

Buǵan deıin Qarjylyq monıtorıng agenttigi alaıaqtyqtyń jańa túri týraly eskertti.