Qazaqstandyqtarǵa Eńbek mınıstrligi tarapynan ótemaqy tólenetini týraly aqparat – jalǵan

ASTANA. KAZINFORM - Áleýmettik jelilerde QR Eńbek jáne halyqty áleýmettik qorǵaý mınıstrligi (budan ári – Eńbekmıni) ótemaqy tóleıtini týraly taratylyp jatqan aqparat shyndyqqa janaspaıdy, dep habarlaıdy mınıstrliktiń baspasóz qyzmeti.

Baspasóz qyzmetiniń málimetterine qaraǵanda, áleýmettik jelilerde qazaqstandyqtarǵa Eńbekmıni tarapynan ótemaqy tólenetini týraly jalǵan aqparat taratylýda. Taǵaıyndalǵan qarajatty aýdarý úshin belgisiz adamdar siltemege ótýdi usynady.

«Áleýmettik kómektiń mundaı túri joq ekenin habarlaımyz. Tıisinshe, habarlamada kórsetilgen silteme alaıaqtar úshin azamattardyń jeke derekterin alý tásili bolýy múmkin. Alaıaqtarmen ózara árekettesýdi boldyrmaý úshin siltemege ótpeýge keńes beremiz»,-delingen habarlamada.

Sondaı-aq onda memlekettik qoldaýdyń tıisti sharalary týraly resmı aqparat tek qana 1414 nómirinen SMS-habarlamalar arqyly taratylatyny aıtylǵan.

«Azamattardan tek resmı kózderdegi aqparatty paıdalanýyn suraımyz. Jalǵan aqparat taratý zańmen jazalanatynyn esterińizge salamyz»,-dep túıindedi mınıstrlik habarlamasyn.