Qazaqstandyqtarǵa elektrondy kitaphana qoljetimdi bolady
ASTANA. KAZINFORM — Qazaqstan kitaphanalarynyń jıyntyq elektrondyq katalogy — elimizdegi kitaphanalar qory týraly bıblıografııalyq málimetterdi qamtıtyn elektrondyq aqparattyq resýrs.
Mádenıet jáne aqparat mınıstriniń 2025 jylǵy 31 naýryzdaǵy buıryǵymen Qazaqstan kitaphanalarynyń jıyntyq elektrondyq katalogyn paıdalaný qaǵıdalary bekitildi.
Qazaqstan kitaphanalarynyń jınaqtalǵan elektrondyq katalogyn qurý jáne júrgizý memlekettik aqparattyq júıe, ıaǵnı «Qazaqstandyq ulttyq elektrondyq kitaphana» (QazUEK) platformasynda júzege asyrylady. Jıyntyq elektrondyq katalog jeke jáne zańdy tulǵalarǵa anyqtamalyq-bıblıografııalyq qyzmet kórsetýge arnalǵan.
Respýblıka kitaphanalary qorynyń bıblıografııalyq málimetteri baspa jáne qoljazba qujattardy, sondaı-aq grafıkalyq jáne aýdıovızýaldy materıaldardy izdeý maqsatynda sáıkestendirýge múmkindik beretin aqparattardy qamtıdy.
Jıyntyq elektrondyq katalogty paıdalaný «Qazaqstandyq ulttyq elektrondyq kitaphana» memlekettik aqparattyq júıesi arqyly tirkeýden ótip, paıdalanýshy avtorızatsııadan ótkennen keıin júzege asyrylady. Katalogta izdeý tegin júrgiziledi.
— Respýblıka kitaphanalary qorlary týraly bıblıografııalyq málimetterdi izdeý qujattyń tili boıynsha júzege asyrylady. Sondaı-aq, paıdalanýshylarǵa qujatty qor ıesiniń ornalasqan jeri boıynsha tańdaý múmkindigi beriledi. Іzdeý kitap basylymdarynyń mindetti shyǵý derekteri elementteri men taqyryptyq suraýlar boıynsha júrgiziledi, — delingen buıryq mátininde.
Buıryq bıyl 19 sáýirden bastap kúshine enedi.
Aıta ketsek, jyl basynda memlekettik kitaphanalarda bilim berý jáne mádenı is-sharalardy aqyly ótkizý quqyǵy berilýi múmkindigi týraly habarlaǵan edik.