Qazaqstandyqtarǵa 4 trln 225 mlrd teńge somasyna zeınetaqy tólendi
ASTANA. KAZINFORM — 2025 jyly respýblıkalyq bıýdjetten 4 trln 225 mlrd teńge somasyna zeınetaqy tólendi, onyń ishinde bazalyq zeınetaqy tóleýge — 1 368,4 mlrd teńge, yntymaqty zeınetaqy tóleýge — 2 856,6 mlrd teńge bólindi, dep habarlaıdy Eńbekmıni baspasóz qyzmeti.
Vedomstvo málimetinshe, 2025 jyldyń qorytyndysy boıynsha eldegi zeınetkerler sany — 2 mln 491 myń adam.
— Jıyntyq zeınetaqynyń ortasha mólsheri 2025 jyldyń qorytyndysy boıynsha 143 143 teńgeni qurady, onyń ishinde yntymaqty zeınetaqy mólsheri — 95 549 teńge, bazalyq zeınetaqy — 47 594 teńge. 2025 jyldyń basynan beri bazalyq zeınetaqy tóleminiń mólsheri QR Ulttyq banki aıqyndaıtyn ınflıatsııanyń boljamdy deńgeıine sáıkes 6,5%-ǵa, yntymaqty zeınetaqy 8,5%-ǵa, ıaǵnı ınflıatsııa deńgeıinen 2%-ǵa oza otyryp ulǵaıtyldy, — delingen habarlamada.
Budan basqa Memleket basshysynyń tapsyrmasy boıynsha 2023 jyldan bastap bes jyl ishinde eń tómen bazalyq zeınetaqyny eń tómen kúnkóris deńgeıiniń 70%-na deıin, eń joǵary — 120%-ǵa deıin jyl saıyn kezeń-kezeńimen arttyrý júzege asyrylady.
Osylaısha, 2025 jylǵy 1 qańtardan bastap bazalyq zeınetaqynyń eń tómen mólsheri eń tómen kúnkóris deńgeıiniń 65%-nan 70%-ǵa deıin ulǵaıtyldy, bul 32 360 teńgeni qurap, onyń eń joǵary mólsheri eń tómen kúnkóris deńgeıinen 105-ten 110%-ǵa deıin arttyrylyp, 50 851 teńgeni quraıdy.
Buǵan deıin habarlanǵandaı, 2026 jylǵy 1 qańtardan bastap bıýdjetten tólenetin zeınetaqy tólemderiniń mólsheri 10%-ǵa artty.
Bazalyq zeınetaqynyń eń tómengi mólsheri 35 596 teńgeni quraıdy, bul — kúnkóris mınımýmynyń 70%-y, al eń joǵary mólsheri kúnkóris mınımýmynyń 110%-nan 118%-yna deıin ulǵaıtylyp, 60 005 teńge boldy.
Aıta keteıik, 2018 jylǵy 1 shildeden bastap memlekettik bazalyq zeınetaqy tólemi zeınetaqy júıesindegi ótilin eskere otyryp, ár alýshyǵa jeke taǵaıyndalady.
Bul rette 1998 jylǵy 1 qańtardaǵy jaǵdaı boıynsha yntymaqty júıede jumys istegen ýaqyty, sondaı-aq mindetti zeınetaqy jarnalary (budan ári — MZJ) tólengen kezeńder zeınetaqy júıesindegi eńbek ótiline qosylady.
Eger azamattyń zeınetaqy júıesindegi ótili 10 jyl nemese odan az bolsa, sondaı-aq múlde joq bolsa, bazalyq zeınetaqy eń tómengi kúnkóris deńgeıiniń 70%-na teń bolsa, sodan keıin 10 jyldan asqan ár jyl úshin onyń mólsheri 2%-ǵa artady. Al eger sizdiń ótilińiz 20 jyl bolsa, bazalyq zeınetaqy tómengi kúnkóris deńgeıiniń 90%-yn quraıdy. Eńbek ótili 30 jyl nemese odan kóp bolsa, kúnkóris deńgeıiniń eń joǵarǵy mólsherinde ıaǵnı 110% belgilenedi.
Eger bir aı ishinde mindetti zeınetaqy jarnalary Biryńǵaı jınaqtaýshy zeınetaqy qoryna birneshe ret aýdarylsa, jınaqtaýshy júıege qatysý merzimi bir aıdy quraıdy.
Osylaısha mindetti zeınetaqy jarnalary neǵurlym turaqty jáne tolyq kólemde aýdarylatyn bolsa, zeınet jasyna jetkende bazalyq zeınetaqy tólemderiniń mólsheri soǵurlym kóp bolady.
Óz kezeginde azamattyń jasyna baılanysty zeınetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 aı qajet) jáne zeınetkerlikke deıingi kezeńdegi ortasha aılyq tabysyna baılanysty bolady.
Osydan buryn 2025 jyly qazaqstandyqtarǵa bala kútimine 806,8 mlrd teńge tólengenin jazǵanbyz.