Qazaqstandyqtardyń jartysynan kóbiniń nesıe tarıhy nashar — sarapshy
ASTANA. KAZINFORM – Halyqtyń 56%-ynyń nesıe alý tarıhy nashar, sonyń saldarynan ıpotekalyq baǵdarlamalarǵa qatysa almaıdy. Bul týraly Freedom bankiniń dırektorlar keńesiniń múshesi Aıdos Jumaǵulov Astana Finance Days sessııasynda málimdedi.
A.Jumaǵulov qarjylyq saýat úshin úlken jaýapkershilik qarjy ınstıtýttarynyń moınynda ekenin atap ótti.
«Tutynýshylardyń minez-qulqyna qaraı aýyp ketý baıqalady. Óıtkeni meniń oıymsha, biz qarjy ınstıtýttary retinde belgili bir ónimderdi shyǵarǵanda jáne tutynýshylar minez-qulqynyń ózgerýine yqpal etkende úlken jaýapkershilik alamyz», - dedi dırektorlar keńesiniń múshesi.
Spıker keltirgen statıstıka boıynsha Qazaqstan halqynyń 34%-ynda jınaq salymy bar. Al búkil Ortalyq Azııa boıynsha statıstıka ortasha eseppen 23% ǵana. Salystyrmaly túrde, Eýropada halyqtyń 65%-ynda jınaqtalǵan qarajat bar.
«Elimizde ekonomıkalyq belsendi 9-10 mıllıon adamnyń 8 mıllıonǵa jýyǵy qandaı da bir jolmen nesıe ónimderimen betpe-bet kelgen», - deıdi Jumaǵulov.
Bul rette sarapshy 18-23 jastaǵy jastar arasynda merzimi ótken kredıtter úlesi jyl saıyn ósip kele jatqanyn aıtyp otyr. 2022 jyldyń basynda olardyń úlesi 13,1% bolsa, 2024 jyldyń tamyzynda – 20,3% deıin ulǵaıǵan. A.Jumaǵulov tutynýshylyq nesıeler men bólip tóleý qazaqstandyqtardyń tutynýshylyq minez-qulqyn ózgertip jatyr dep sanaıdy.
«18 jastaǵy jigit nemese qyz óz jasynda merzimi ótken nesıe qalypty jaǵdaı dep oılaıdy jáne árdaıym nesıe ala beretindeı kóredi. Mysaly, 25 jasynda avtokólik nesıesin alǵysy kelse, 30 jasta otbasyn quryp, ıpoteka alǵysy kelse – muny jasaı almaıdy. Biz klıentterdiń 87%-yna nesıe tarıhy nashar bolǵandyqtan, 31%-yna – tabys jetkiliksiz bolǵandyqtan nesıe berýden bas tartamyz», - dedi A.Jumaǵulov.
Aıta keteıik, Astanada jyl saıynǵy dástúrli «Astana Finance Days 2024» bastaldy. Bıylǵy basqosý «Innovatsııa. Investıtsııa. Serpin» taqyrybynda ótedi. Onda qarjy sektoryndaǵy ozyq tehnologııalar, Qazaqstannyń ınvestıtsııalyq múmkindikteri jáne qarjynyń ornyqty damýǵa jáne qoǵamdaǵy oń ózgeristerge áseri talqylanbaq.
