Qazaqstandyqtardyń jartysynan kóbi memlekettik merekelerdi rámizdermen baılanystyrady
ASTANA. KAZINFORM – Qazaqstandyqtardyń basym bóligi memlekettik merekelerdi eldiń basty memlekettik rámizderimen baılanystyrady. Mundaı qorytyndy Qazaqstandyq qoǵamdyq damý ınstıtýty júrgizgen áleýmettik zertteý nátıjesinde belgili boldy.
«Memlekettik merekeler sımvoldyq saıasattyń quraly retinde» taqyrybyndaǵy zertteýge elimizdiń ár óńirinen 3 myń adam qatysqan.
Zertteý nátıjesi boıynsha respondentterdiń 51,2%-y memlekettik merekelerdi eń aldymen Memlekettik Tý men Eltańbamen baılanystyrsa, 44,1%-y Memlekettik Ánurandy ataǵan.
– Memlekettik rámizderdiń reıtıngte úlken basymdyqpen kósh bastaýy qazaqstandyqtardyń memlekettik merekelerdi jaı demalys kúni retinde emes, egemendik pen ulttyq birliktiń belgisi retinde qabyldaıtynyn kórsetedi, – delingen zertteý qorytyndysynda.
Saýalnama barysynda ulttyq qundylyqtarǵa qatysty kózqarastar da anyqtalǵan. Azamattardyń 38,1%-y memlekettik merekelerdi ulttyq kıimmen baılanystyrsa, 22%-y tarıhı tulǵalardy ataǵan.
Zertteý avtorlarynyń pikirinshe, bul qoǵamnyń merekelerdi mádenı kodty saqtaýdyń, tarıhı jady men urpaqtar sabaqtastyǵyn nyǵaıtýdyń mańyzdy quraly retinde qabyldaıtynyn ańǵartady.
Merekelerdiń syrtqy atrıbýttary retinde qatysýshylardyń 24,3%-y buqaralyq serýender men kontsertterdi, 23,8%-y ulttyq taǵamdardy, al 17,1%-y otshashýlardy ataǵan.
– Qoǵam forma men mazmundy naqty ajyrata biledi. Kontsertter men merekelik is-sharalar mańyzdy bolǵanymen, olar memlekettik rámizder men patrıottyq qundylyqtardan keıingi orynda tur, – dep atap ótti zertteý avtorlary.
Al reıtıngtiń sońǵy oryndarynda syılyqtar men quttyqtaýlar (7,7%), sondaı-aq áleýmettik jelilerdegi resmı merekelik bezendirýler (4,1%) ornalasqan.
Zertteý qorytyndysyna sáıkes, memlekettik merekeler qazaqstandyq qoǵamdy biriktiretin jáne patrıotızmdi nyǵaıtatyn mańyzdy qural retinde óz rólin saqtap otyr.
Aıta keteıik, buǵan deıin memlekettik rámizderdiń tarıhy, mán-mańyzy men qoldaný erejeleri týraly jazdyq.
