El azamattarynyń jartysynan kóbi JI servısterin qoldanady - saýalnama

ASTANA. KAZINFORM – Qazaqstandyqtardyń 51,1%-y ChatGPT, Google Gemini, Midjourney jáne basqa da jasandy ıntellekt tehnologııalaryn qoldanady. Bul derekter QR Prezıdenti janyndaǵy Qazaqstannyń strategııalyq zertteýler ınstıtýty júrgizgen áleýmettik saýalnama nátıjesine negizdelgen.

Saýalnamaǵa sáıkes, jasandy ıntellektini eń belsendi paıdalanatyndar – jastar. 18-29 jas aralyǵyndaǵy respondentterdiń 76,2%-y JI servısterin qoldanatynyn aıtqan. 30-45 jas tobynda bul kórsetkish 57,1%-ǵa deıin tómendeıdi. Jasy ulǵaıǵan saıyn tehnologııany paıdalaný deńgeıi azaıa túsedi: 46-60 jas aralyǵyndaǵy topta – 37,5%, al 61 jastan asqan azamattar arasynda – 16,6%.

- Jastar tsıfrlyq quraldardy kóbine oqý úrdisinde jáne ózin-ózi damytý úshin qoldanady (48,7%). Sondaı-aq mátindermen jumys isteý de keń taralǵan (44,2%). Orta jastaǵy respondentterdiń suranystary da osy baǵyttarmen sáıkes keledi. Al 61 jastan asqan azamattar úshin JI negizinen aqparat izdeý quralyna aınalyp otyr: bul toptyń 40,8%-y jasandy ıntellektti izdeý júıesi retinde paıdalanady, - delingen ınstıtýt dereginde.

Zertteý genderlik jáne áleýmettik-demografııalyq aıyrmashylyqtardy da kórsetti. Áıelder jasandy ıntellekt servısterin erlerge qaraǵanda jıi qoldanady (54,6% jáne 46,6%). Qala turǵyndary tehnologııany aýyl halqyna qaraǵanda belsendirek paıdalanady: tıisinshe 53,2% jáne 47,9%. Bul qaladaǵy tsıfrlyq ınfraqurylymnyń qoljetimdiligimen túsindiriledi.

Bilim deńgeıi de mańyzdy faktorlardyń biri. Joǵary bilimdi respondentterdiń 64,2%-y JI servısterin qoldansa, orta bilimdi azamattar arasynda bul kórsetkish 37,7%-dy quraıdy.

Sarapshylardyń pikirinshe, bul bilim deńgeıiniń jańa tehnologııalardy meńgerýge yqpalyn aıqyn kórsetedi.

Saýalnama QSZI tapsyrysymen 2025 jylǵy 3 qazan – 5 qarasha aralyǵynda ótkizilgen. Oǵan 17 oblys pen Astana, Almaty jáne Shymkent qalalarynan 8 myń respondent qatysqan.

Aıta keteıik, Astanada jasandy ıntellektiniń kómegimen jasalǵan alǵashqy spektakl qoıyldy.