Qazaqstandyqtardyń jartysyna jýyǵy AQSh vızasyn ala almaıdy — QR SІM
ASTANA. KAZINFORM — AQSh vızasyna ótinish bergen qazaqstandyqtardyń shamamen 45-46% teris jaýap alady. Bul týraly Senattaǵy brıfıngte QR Syrtqy ister mınıstriniń birinshi orynbasary Erjan Ashyqbaev málimdedi.
Tilshilerdiń shetel vızasyn alýda qıyndyqtarǵa tap bolatyn qazaqstandyqtar týraly suraǵyna jaýap bergen Erjan Ashyqbaev álem boıynsha naqty statıstıkany keltirý qıyn ekenin aıtty.
— Vıza berýden bas tartý — bizdiń seriktes elderdiń egemen quqyǵy. Kóp jaǵdaıda mundaı aqparat jeke derekterge qatysty bolǵandyqtan jarııa etilmeıdi, sonyń ishinde bizge de berilmeıdi. Sondyqtan naqty sanyn aıtý qıyn. Keıbir elder ǵana bas tartý kórsetkishterin jarııalaıdy. Máselen, AQSh-ta vızaǵa ótinish berýshilerdiń shamamen 45-46 paıyzyna teris jaýap berilgen, — dedi mınıstrdiń birinshi orynbasary.
E. Ashyqbaev qazirgi halyqaralyq jaǵdaıdyń qubylmaly ekenin jáne kóptegen memleketterdiń shetel azamattaryna qatysty qosymsha talaptardy kezeń-kezeńimen engizip jatqanyn atap ótti.
— Sondyqtan vıza alýda qıyndyqqa tap bolǵan azamattardyń naqty sany týraly tolyq málimet berý qıyn, — dedi Erjan Ashyqbaev.
Ol sondaı-aq qazaqstandyqtardyń shetelge shyqqanda qabyldaýshy eldiń zańdaryn saqtaýǵa mindetti ekenin eske saldy.
— Bizdiń azamattar shetelge barǵanda da sol eliniń zańnamasyn oryndaýǵa mindetti, — dedi spıker.
Brıfıng barysynda tilshiler Japonııamen vızalyq rejımdi jeńildetý múmkindigi týraly da surady. Erjan Ashyqbaevtyń aıtýynsha, bul baǵyttaǵy jumys turaqty túrde júrgizilip jatyr, alaıda naqty kelisimderge qashan qol jetkiziletini belgisiz.
— Bul — qyr-syry kóp ári uzaq ýaqytty qajet etetin protsess. Japonııadaǵy seriktesterimizben jáne basqa da eldermen bul jumysty jalǵastyramyz. Naqty nátıjeler bolǵanda mindetti túrde habarlaımyz, — dedi ol.
QR SІM ókili vızalyq rejım máseleleri Qazaqstannyń ǵana emes, seriktes memleketterdiń de sheshimderine baılanysty ekenin atap ótti.
Aıta keteıik, otandyq avıatsııa mamandary Nıý-Iorktiń eń iri áýejaıynda halyqaralyq júk tasymalynyń qaýipsizdik erejelerin meńgerip qaıtty.
https://kaz.inform.kz/news/aksh-ka-tkeley-reys-zhakindadi-kazakstan-aviatorlari-nyu-yorkte-okuda-zhur-68d39ca9
