Qazaqstandyqtardyń tabysy jańa ádispen aıqyndalady
ASTANA. KAZINFORM — Keler jyldan bastap salyq organdary qazaqstandyqtardyń tabysyn janama ádispen tekseredi.
Jańa qaǵıdany Qarjy mınıstri Mádı Takıev bekitti, ol kúshine 2026 jylǵy 1 qańtarda enedi.
Qujatta aıtylǵandaı, janama ádisti qoldaný azamattar salyq organdaryna kirisi men shyǵysy jáne múlki týraly deklaratsııa tapsyrǵannan keıin salystyrý kezinde týyndaýy múmkin. Naqty aıtqanda, eger adamnyń shyǵysy resmı kórsetilgen tabysynan asyp ketse, salyq qyzmeti naqty tabysyn shyǵyndar, jyljymaıtyn múlik, avtokólikter jáne basqa da aktıvterdiń quny negizinde anyqtaı alady.
Kiris pen shyǵysty taldaý
Salyq organdary azamattardyń tabysyn baǵalaý kezinde derekterdi taldaıdy. Onyń ishinde bank shottaǵy qarajat qozǵalysyn, múlikke, bilimge, medıtsınaǵa, saqtandyrýǵa, baǵaly qaǵazdarǵa jumsalǵan shyǵyndardy, sheteldegi tabystary men múlik týraly aqparatty tekseredi. Odan bólek salyq esebi jáne tekserý nátıjesin, memlekettik organdar men sheteldik ýákiletti qurylymdardan alynǵan málimetterdi salystyryp, taldaý júrgizedi.
Osylaısha, 2026 jyldan jeke tulǵalardyń deklaratsııada kórsetken tabysy tirkelgen múlikke jumsalǵan shyǵysynan az bolsa, janama ádispen tekserý júrgizýge jatady. Sonymen qatar eger azamat esep júrgizý erejelerin buzsa nemese qujattaryn joǵaltsa, eger jeke tulǵa is júzinde kásipkerlik qyzmetpen aınalysyp, biraq resmı túrde kásipker retinde tirkelmegen bolsa da Kirister komıtetiniń nazaryna iligedi.
— Eger jeke tulǵanyń salyq esebinde kórsetken kiristeri onyń jumsaǵan shyǵystarymen sáıkes kelmegen jaǵdaıda, memlekettik kirister organdary, jeke tulǵanyń ótken kezeńdegi kiristerin eskere otyryp, sonyń shyǵyndary negizinde kiristi jáne salyqty aıqyndaıdy, — delingen qujatta.
Aıta ketsek, 2026 jyly aılyq tabysy 3 mln teńgeden asqan jeke tulǵalar 15 paıyz jeke tabys salyǵyn tóleı bastaıdy.