Qazaqstandyqtardyń shetelde qıyndyqqa tap bolýy jıiledi – SІM úndeý jasady
ASTANA. KAZINFORM – Sońǵy kezderi Qazaqstan azamattarynyń shetelde ımmıgratsııalyq, vızalyq, tranzıttik jáne kedendik talaptardy oryndamaý nemese bilmeý saldarynan qıyndyqqa tap bolý jaǵdaılary kóbeıgen. QR Syrtqy ister mınıstrligi shetelge shyǵatyn qazaqstandyqtarǵa mańyzdy eskertý jasady.
QR SІM resmı ókili Erlan Jetibaev qajetti vızalar men qujattardyń bolmaýyna baılanysty ushaqqa otyrǵyzýdan bas tartý, bolý merzimderin buzý, tyıym salynǵan nemese deklaratsııalanbaǵan taýarlardy tasymaldaý áreketteri jáne shetelde tranzıttik jáne bolý erejelerin saqtamaý jaǵdaılary tirkelgenin aıtty.
– Osyǵan baılanysty azamattarǵa baratyn eldiń, sondaı-aq tranzıttik elderdiń zańdaryn, vızalyq jáne ımmıgratsııalyq talaptaryn muqııat qarap shyǵýdy usynamyz. Tólqujattardyń, vızalardyń, turýǵa ruqsattardyń jáne basqa da qujattardyń jaramdylyq merzimderine erekshe nazar aýdarý qajet. Sondaı-aq medıtsınalyq saqtandyrý satyp alýdy, áýe bıletterin tek resmı qyzmetter arqyly satyp alýdy, áýe bagajy men tranzıt talaptaryn saqtaýdy, qujattaryńyzdy úshinshi tulǵalarmen bólispeýdi jáne basqa adamdardyń sómkelerin, sálemdemelerin nemese basqa da paketterin tasymaldamaýdy usynamyz, – dedi E. Jetibaev elordada ótken brıfıngte.
Jumysqa, oqýǵa nemese em alýǵa shetelge shyǵatyn azamattar barlyq qajetti qujattardyń, shaqyrýlardyń, eńbek sharttarynyń jáne ruqsattardyń zańdy túrde alynǵanyna aldyn ala kóz jetkizýi kerek.
– Qazaqstannyń dıplomatııalyq jáne konsýldyq mekemeleri azamattarǵa óz quzyreti sheginde qajetti konsýldyq jáne quqyqtyq kómek kórsetedi. Degenmen, azamattar baratyn eldiń zańdaryn saqtaýǵa jáne belgilengen talaptardy oryndaýǵa ózderi tolyq jaýapty. Olardy shetelge saparlaryn jaýapkershilikpen josparlaýǵa jáne shetel memleketteriniń zańdaryn qatań saqtaýǵa shaqyramyz, – dedi resmı ókil.
Eske sala ketsek, BAÁ-de ómir boıyna sottalǵan qazaqstandyqty elge qaıtarý múmkindigi qarastyrylyp jatyr.
Sondaı-aq Germanııada Qazaqstan azamaty zańǵa qaıshy áreketi úshin ustaldy.
