Qazaqstandyqtardyń saýsaq izin ne úshin alady – vıtse-mınıstr jaýap berdi
2024 jyldyń birinshi qańtarynan bastap barsha qazaqstandyqtardyń saýsaq izin alatyny týraly málimet ótirik. Іshki ister vıtse-mınıstri Marat Qojaev Úkimet otyrysynan keıin ótken baspasóz máslıhatynda osyndaı túsinikteme berdi, dep habarlaıdy QazAqparat tilshisi.
«2024 jyldyń birinshi qańtarynan bastap búkil qazaqstandyqtardyń saýsaq izi alynbaıdy. Saýsaq izin tirkeý týraly bul zań 2016 jyly qabyldanǵan. Birden aıtaıyn, bul Qazaqstan oılap taýyp otyrǵan jańashyldyq emes. Ondaı júıe kóptegen elderde, onyń ishinde jetekshi elderde de bar», - dedi Marat Qojaev Úkimettegi baspasóz máslıhatynda.
Vıtse-mınıstr zań kúshine engennen keıin de qazaqstandyqtar saýsaq izin túsirtýge mindetti emes ekenin túsindirdi.
«Zań 2024 jyldyń 1 qańtarynan bastap qana qoldanyla bastaıdy. Bul barshańyz saýsaq izin túsirtýge barasyzdar degen sóz emes. Qajettiligine qaraı, mysaly jeke kýáliktiń nemese tólqujattyń merzimi aıaqtalǵanda barasyz.
Qujattandyrý júıesi eshqalaı ózgermeıdi. Onyń ústine jeke qujatyńyzǵa saýsaq izi túrindegi qosymsha qorǵanysh tetigi engiziledi», - dedi ІІM ókili.
