Qazaqstandyqtardyń ortasha jasy – 32,3 jas

ASTANA. KAZINFORM – 2024 jyldyń basynda Qazaqstan halqynyń ortasha jasy 32,3 jasty qurady. Bul týraly Ulttyq statıstıka bıýrosy málim etti.

Vedomstvonyń málimetinshe, sońǵy bes jylda bul kórsetkish 31,9 jastan 32,3 jasqa deıin ósken.

Genderlik bóliniste erlerdiń ortasha jasy – 30,7 jas, áıelderdiki – 33,9 jas.

Óńirler bólinisinde eń jas turǵyndar Túrkistan oblysynda – ortasha jas 27,7 jyl. Odan keıingi orynda Mańǵystaý oblysy men Shymkent qalasy – 27,8 jas.

Al eń joǵary ortasha jas Soltústik Qazaqstan oblysynda tirkelgen – 39,2 jas. Sondaı-aq Shyǵys Qazaqstan oblysynda bul kórsetkish – 38,9 jas, Qostanaı oblysynda – 38 jas.

Statıstıkalyq derekterge sáıkes, qala turǵyndarynyń ortasha jasy – 32,7 jas, aýyl turǵyndarynda – 31,7 jas.

Aıta keteıik, Qazaqstanda el halqynyń densaýlyq jaǵdaıy týraly statıstıkalyq jınaq jaryq kóredi.