Qazaqstandyqtardyń ómir súrý uzaqtyǵy artty – vıtse-mınıstr medıtsınadaǵy basty ózgerister týraly
Memlekettegi densaýlyq saqtaý deńgeıi halyqtyń ómir súrý sapasyna tikeleı áser etedi. QR Densaýlyq saqtaý birinshi vıtse-mınıstri Tımýr Sultanǵazıev Kazinform tilshisine 2023 jylǵy densaýlyq saqtaý salasyndaǵy basty ózgerister týraly aıtyp berdi.
Ólim deńgeıiniń tómendeýi
Densaýlyq saqtaý birinshi vıtse-mınıstri Tımýr Sultanǵazıev Qazaqstannyń densaýlyq saqtaý salasynyń 2023 jyly qol jetkizgen mańyzdy jetistikteriniń biri retinde ólim-jitim deńgeıiniń tómendegenin atap ótti.
Osy jylǵy 10 aıda 2022 jyldyń uqsas kezeńimen salystyrǵanda halyqtyń jalpy óliminiń kórsetkishi 5,7%, qan júıesi aýrýlarynan ólim 6,9%, qaterli isikterden 0,6%, jazataıym oqıǵalar men ýlanýdan 4,2%, tynys alý aǵzalarynyń aýrýlarynan 4,7%, 11 aıda týberkýlezden 22,1% tómendegeni baıqalady, – dep bólisti vıtse-mınıstr.
Sondaı-aq, Tımýr Sultanǵazıev bıylǵy 10 aıda náreste ólimi 9,6%, 11 aıda ana óliminiń kórsetkishi 24,4% tómendegenin jetkizdi.
Qazaqstandyqtardyń medıtsınaǵa degen senimi artty
Osy jyldaǵy aıtýly ózgeris retinde halyqtyń medıtsınaǵa degen seniminiń artýyn aıtýǵa bolady. Buǵan Halyqtyń medıtsınalyq-sanıtarlyq alǵashqy kómek (MSAK) qyzmetine qaralýshylardyń kóbeıgeni dálel.
Osy jylǵy 11 aıda qaralý - 90,1 mln jetti, 2022 jyly – 87,6 mln bolǵan edi, ósim 10% nemese bir turǵynǵa shaqqanda 4,8 qaralý bolyp tirkeldi, – dep keltirdi derekterdi vıtse-mınıstr.
DSM málimetinshe, bıyl bastapqy býyn úshin 78 nysan salynyp, 80 nysan jóndelgen. Medıtsınalyq-sanıtarııalyq alǵashqy kómek uıymdarynda 110 myńnan astam adam, onyń ishinde 34 195 dáriger jáne 75 852 orta býyn qyzmetkeri jumys isteıdi.
Aýyl turǵyndaryna keńeıtilgen skrınıngti engizý
Vıtse-mınıstr bıyl aýyldyń 1,1 mln turǵyny profılaktıkalyq tekserýden ótip, 62 myń naýqas anyqtalǵanyn málimdedi.
Aýyl turǵyndary úshin keńeıtilgen skrınıng engizildi, onda búırek, asqazan-ishek joldary, tynys alý aǵzalary, qýyqasty obyry aýrýlaryn erte anyqtaýǵa medıtsınalyq qyzmetter engizildi, – dedi Tımýr Sultanǵazıev.
Dári-dármekpen qamtamasyz etý úshin eki ese kóp qarajat bólindi
Dári-dármekpen qamtamasyz etý máselesine keletin bolsaq, bul salada da aıtarlyqtaı jaqsy ózgerister bar.
2019 jyldan bastap ambýlatorııalyq dári-dármekpen qamtamasyz etýge bólingen qarajattyń kólemi 2 eseden astam ulǵaıyp, 237 mlrd teńgege jetti. Bul TMKKK jáne MÁMS boıynsha nozologııalardyń sanyn 48-den 126-ǵa deıin jáne TMKKK jáne MÁMS dárilik ataýlarynyń sanyn 272-den 347-ge deıin 2,5 esege arttyrýǵa múmkindik berdi, – dedi Tımýr Sultanǵazıev.
Dárigerler men medıtsına qyzmetkerleriniń jalaqysyn kóterý
Memleket basshysynyń tapsyrmasyn oryndaý úshin 2020 jyldan bastap 2023 jylǵa deıin medıtsına qyzmetkerleriniń: dárigerdiń jalaqysy kezeń-kezeńimen (jyl saıyn) 30%-ǵa, orta medıtsına qyzmetkeriniń jalaqysy 20%-ǵa arttyryldy.
Bizdiń salada 78 myńnan astam dáriger jáne 180 myńǵa jýyq orta medıtsına qyzmetkeri jumys isteıdi. Bıylǵy 11 aıda statsıonarlarda 3 mln-ǵa jýyq adamǵa kómek kórsetildi, MSAK jelisi 90 mln-nan astam adamdy qabyldady, 360 myńnan astam náreste dúnıege keldi, al jedel medıtsınalyq járdemniń kúshimen 8 mln-nan astam shaqyrtý boıynsha kómek kórsetildi, – dep túıindedi densaýlyq saqtaý vıtse-mınıstri.
