Qazaqstandyqtardyń nesıesi 27,5 trln teńgege jetken
ASTANA. KAZINFORM – Qazaqstandyqtardyń nesıe júktemesi tym artyp ketken. QR Ulttyq ekonomıka birinshi vıtse-mınıstri Azamat Ámrın Úkimette 2026–2029 jyldarǵa arnalǵan halyq tabysyn arttyrý jónindegi keshendi jospar tanystyrylǵannan keıin uıymdastyrylǵan baspasóz konferentsııasynda naqty statıstıkany málimdedi.
Onyń sózinshe, atalǵan josparda halyqtyń qaryz júktemesin tómendetý jáne qarjylyq belsendiligin arttyrý qarastyrylǵan.
– Birinshi kredıttik bıýro taldaý ortalyǵynyń derekterine júginsek, 2026 jyldyń 1 qańtaryndaǵy jaǵdaı boıynsha, bıýroǵa aqparat beretin barlyq uıymǵa halyqtyń qaryzy – 27,5 trıllıon teńge. Bul somaǵa jeke kásipkerlerdiń nesıeleri jáne esepten shyǵarylǵan bereshek kirmeıdi. Al eń sońǵy tólem úshin aýdarylǵan syıaqy esepke alyndy, – dedi vıtse-mınıstr.
Onyń aıtýynsha, jalpy 8,95 mıllıon boryshkerdiń 39,4 mıllıon nesıesi bar. Sonda orta eseppen ár adamǵa 4,4 nesıeden keledi.
Aıta keteıik, buǵan deıin elimizde nesıe bergende, qaryz júktemesin esepteý erejesi ózgeretinin jazǵanbyz.
