Qazaqstandyqtardyń materıaldyq jaǵdaıy nasharlaǵan — Ulttyq bank saýalnamasy
ASTANA. KAZINFORM — Ulttyq banktiń qarasha aıyndaǵy ınflıatsııalyq kútýlerdi anyqtaýǵa arnalǵan saýalnamanyń qorytyndysyn jarııalady.
— 2024 jyldyń qarasha aıynda tutyný kóńil-kúıiniń ındeksi 111-ge deıin tómendedi (2024 jylǵy qazan — 114,7). Aldaǵy 5 jylǵa eldiń damý perspektıvalaryn baǵalaý 5,2 pýnktke tómendep, 101,8-ge tústi. Sonymen qatar, jeke materıaldyq jaǵdaıdyń aldaǵy bir jyldaǵy ózgerýin baǵalaý 3,7 pýnktke tómendep, 121,5-ke tústi. Qazirgi jaǵdaıdy baǵalaýda saýalnamaǵa qatysqandardyń sońǵy jyly jeke materıaldyq jaǵdaı kórsetkishi 5,3 pýnktke tómendep, 99,3-ke jetken. Al qomaqty qarjyǵa saýda jasaýǵa daıyn bolý 8,9 pýnktke tómendep, 103,5 boldy, — dep jazylǵan saýalnama qorytyndysynda.
Saýalnamaǵa qatysqandardyń 68,2%-y qarashada azyq-túlik taýary qymbattaı túskenin sezingen. Qazan aıynda osylaı jaýap bergenderdiń úlesi 64,6% bolǵan edi. Al azyq-túliktik emes taýarlardyń baǵasy óskenin saýalnamaǵa tartylǵandardyń 13,4%-y sezingen. Qazan aıynda bul kórsetkish 17,3% bolǵan. Jaýap berýshilerdiń kóbi qarasha aıynda ásirese jemis-jıdek pen kókónis, et jáne sút ónimderi, dári-dármek, kıim men aıaqkıim, turmystyq hımııa qymbattaǵanyn aıtqan.
— Aldaǵy 12 aıdaǵy halyqtyń ınflıatsııalyq kútýleri áli de qubylmaly. Qarashada kórsetkish qaıtadan 14,1%-ǵa deıin ósti. Sońǵy aılarda ınflıatsııalyq kútýler teńgeniń nomınaldy aıyrbas baǵamynyń ózgerýi jáne jyldyq ınflıatsııanyń baıaýlaý qarqynynyń turaqtylyǵy tómendeýi aıasynda qalyptasyp otyr. Sonymen qatar, eldiń damý perspektıvalary men jeke materıaldyq jaǵdaıǵa qatysty baǵalaýlardyń tómendeýi esebinen tutyný kóńil-kúıi nasharlap otyr, — dep jazady Ulttyq bank sarapshylary.
Buǵan deıin habarlaǵanymyzdaı, Ulttyq bank qarashadaǵy Aqsha-kredıt saıasaty týraly baıandamany jarııalady.