Qoǵamdyq keńesterge joldaǵan ótinishteriniń 60%-dan astamy oń sheshimin tapty - mınıstrlik
ASTANA. KAZINFORM - Qoǵamdyq keńester ınstıtýty memleket pen qoǵam arasyndaǵy baılanysty nyǵaıtyp keledi. Búginde elimizde 264 qoǵamdyq keńes bar. Onyń 36-sy – respýblıkalyq, 228-i – jergilikti deńgeıde jumys isteıdi, dep habarlaıdy QR Mádenıet jáne aqparat mınıstrliginiń baspasóz qyzmeti.
Keńes músheleriniń 74%-yn azamattyq qoǵam ókilderi quraıdy. Qoǵamdyq keńester azamattardyń memlekettik sheshimderdi qabyldaý úderisine qatysýyna jáne qoǵamdyq baqylaýdy júzege asyrýyna múmkindik beredi. 2026 jyldyń alǵashqy jartyjyldyǵynda qoǵamdyq keńester azamattardyń quqyqtary, bostandyqtary men zańdy múddelerine qatysty 3 400-den astam normatıvtik quqyqtyq aktiniń jobasyn qarady.
Osy kezeńde halyqty aýyz sýmen qamtamasyz etý, sanıtarııalyq-epıdemıologııalyq qaýipsizdik, áleýmettik qorǵaý, bilim berý, turǵyn úı-kommýnaldyq sharýashylyǵy jáne ózge de ózekti máseleler boıynsha 495-ten astam qoǵamdyq tyńdaý ótkizildi.
Qoǵamdyq keńester qyzmetiniń negizgi baǵyttarynyń biri – memlekettik organdardyń qoǵam aldyndaǵy esep berýin qamtamasyz etý. Jyl basynan beri respýblıkalyq jáne jergilikti memlekettik organdardyń jáne kvazımemlekettik sektor uıymdary basshylarynyń 990 esebi tyńdaldy.
Talqylaý qorytyndysynda memlekettik basqarýdyń tıimdiligin arttyrý, tsıfrlandyrýdy damytý, memlekettik qyzmetterdiń sapasyn jaqsartý, azamattardyń ótinishterimen jumysty jetildirý jáne memlekettik organdardyń ashyqtyǵyn kúsheıtý jóninde usynymdar ázirlendi.
Qoǵamdyq keńester azamattardyń ótinishterin qaraýǵa da aıryqsha mán beredi. Bıylǵy alǵashqy jartyjyldyqta áleýmettik qorǵaý, densaýlyq saqtaý, ınfraqurylym, jer qatynastary jáne basqa da áleýmettik mańyzy bar máselelerge qatysty 900-den astam ótinish qaraldy. Olardyń 60%-dan astamy oń sheshimin tapty.
Qoǵamdyq keńesterdiń qyzmeti kazkenes.kz biryńǵaı aqparattyq portaly arqyly júrgiziledi. Portalda qoǵamdyq keńesterdiń quramy, otyrystardyń kún tártibi men hattamalary, beınetranslıatsııalar jáne qoǵamdyq bastamalar jarııalanyp turady.
Portal iske qosylǵaly beri oǵan 1,8 mıllıonǵa jýyq paıdalanýshy kirgen. Respýblıkalyq jáne jergilikti qoǵamdyq keńesterdiń jumysyn úılestirý maqsatynda Mádenıet jáne aqparat mınıstrligi janynan Úılestirý ortalyǵy qurylǵan. Ortalyq qoǵamdyq keńesterge ádistemelik qoldaý kórsetip, ozyq tájirıbelerdi bólisýge jáne qoǵamdyq baqylaýdy júzege asyrýdyń ortaq tásilderin qalyptastyrýǵa yqpal etedi.
Osyǵan deıin elde barlyq memlekettik jáne qoǵamdyq ınstıtýttardy túbegeıli jańǵyrtý bastalǵany týraly jazdyq.
