Qazaqstandyqtardyń emdelýge jumsaıtyn shyǵyny kúrt ósken

ASTANA. KAZINFORM — Birinshi kredıttik bıýro Ulttyq statıstıka bıýrosy júrgizgen saýalnamaǵa súıenip, qazaqstandyqtardyń medıtsına qyzmetterine jumsaıtyn shyǵyny kúrt artqanyn málim etti.

— Birinshi toqsannyń qorytyndysy boıynsha qazaqstandyqtardyń medıtsına qyzmetterine jumsaǵan jan basyna shaqqandaǵy shyǵyny ınflıatsııamen qosqanda 28,3% ósken (3600 teńgeden 4600 teńgege deıin). Bul — keıingi eki jyldaǵy rekord. Naqty mándegi ósim — 14,9%, — dep jazylǵan saraptamada.

Bul jerde tek medıtsına qyzmetteri men taýarlaryna jumsaıtyn shyǵyn ǵana esepke alynǵanyn aıtý kerek.

Jan basyna shaqqandaǵy medıtsına shyǵyndarynyń eń kóp bóligi tis emdetýge ketken — 2400 teńge. Inflıatsııamen qosyp eseptegende 26%, naqty mánde 11,8% ósim bolǵan.

Jan basyna shaqqanda 2400 teńge degen tym az soma bolyp kórinýi múmkin. Biraq Qazaqstandaǵy 20 mln halyq jyldyń alǵashqy úsh aıynda túgel tis emdetpegeni belgili.

Óıtkeni jan basyna shaqqandaǵy shyǵyndy eseptegen kezde eldegi búkil halyqtyń sany esepke alynady. Al shyǵyn somasy resmı statıstıka túzý úshin ekshelgen 12 myń otbasynyń kórsetkishterinen alynady.

— Al eń jyldam ósip jatqan shyǵyn túri aýrýhanaǵa jumsaıtyn shyǵyndar bolǵan. Onyń ishinde kúndizgi statsıonar men shıpajaıda em alý shyǵyndary da esepke alynǵan. Shyǵynnyń ósimi naqty mánde 39,8%, ınflıatsııamen qosqanda 54,1% boldy. Al dáriger qyzmeti men alǵashqy qabyldaýǵa barý shyǵyndary ınflıatsııamen qosqanda 5,7%, naqty mánde 5,1% artqan. Jan basyna shaqqanda 559 teńge, — dep jazady DataHub.

Birinshi toqsanda qazaqstandyqtardyń jan basyna shaqqandaǵy tabysy ınflıatsııamen qosqanda 10,1% ósken. Aqshalaı mánde – 350,4 myń teńge. Al bul ósimnen ınflıatsııany alyp tastasa, naqty mándegi ósim 0,7% ǵana.

Aıta ketý kerek, jańa Salyq kodeksi kelesi jyly kúshine ense, dári-dármek pen medıtsınalyq qyzmetke salynatyn QQS 5%-ǵa deıin túsýi múmkin.