Qazaqstandyqtardyń basym bóligi eldiń damý baǵytyn oń baǵalaıdy — QSZI
ASTANA. KAZINFORM — 2026 jylǵy sáýir aıynda Qazaqstan Respýblıkasynyń Prezıdenti janyndaǵy Qazaqstan strategııalyq zertteýler ınstıtýtynyń tapsyrysy boıynsha júrgizilgen áleýmettanýlyq zertteý nátıjeleri qazaqstandyqtardyń basym bóligi eldiń qazirgi damý baǵytyn oń baǵalaıtynyn kórsetti. Bul týraly ınstıtýttyń baspasóz qyzmeti málim etti.
Atap aıtqanda, saýalnamaǵa qatysqandardyń 84,4%-y elimiz durys baǵytta damyp keledi dep esepteıdi.
— Aýmaqtyq bólinis ártúrli eldi meken turǵyndarynyń baǵalaýlarynda joǵary deńgeıdegi úılesimdilikti kórsetedi. Qala turǵyndarynyń arasynda respondentterdiń 84%-y eldiń damý baǵytyn oń baǵalasa, aýyl turǵyndary arasynda bul kórsetkish sál joǵary — 85,2%-dy quraıdy. Bul turǵylyqty jerine qaramastan, azamattardyń qazirgi baǵytty qabyldaýy uqsas ekenin kórsetedi, — delingen habarlamada.
Gender turǵysynan taldaý erler men áıelderdiń de joǵary deńgeıde oń baǵa beretinin kórsetedi. Sonymen qatar, áıelder arasynda bul kórsetkish birshama joǵary — 86,2%-dy qurady, bul erler arasyndaǵy kórsetkishten 4,3%-ǵa artyq.
Jas ereksheligi turǵysynan eń joǵary qoldaý deńgeıi jastar arasynda tirkeldi — 89,3%. Bul jastardyń qazirgi saıası baǵytty anaǵurlym oń qabyldaıtynyn kórsetedi.
Satyp alý qabileti artqan saıyn oń baǵalar da aıtarlyqtaı ósetini baıqalady. Ózderiniń ekonomıkalyq jaǵdaıynyń jaqsarǵanyn sezinetin respondentter bul ilgerileýdi qazirgi saıası baǵytpen baılanystyrýǵa beıim.
— Jalpy alǵanda, zertteý nátıjeleri qazaqstandyqtardyń saıası baǵytqa bergen baǵasy negizinen oń sıpatqa ıe ekenin jáne halyqtyń negizgi áleýmettik-demografııalyq erekshelikterine qaramastan joǵary deńgeıde saqtalatynyn kórsetedi, — dep habarlady zertteýler ınstıtýtynan.
Áleýmettik saýalnama QSZI tapsyrysy boıynsha 2026 jylǵy 10 sáýir men 10 mamyr aralyǵynda júrgizildi. Іrikteý jıyntyǵynyń kólemi — 8 000 respondent. Saýalnamaǵa 17 oblys pen respýblıkalyq mańyzy bar 3 qalalar — Astana, Almaty jáne Shymkent qalalarynan 18 jastan asqan respondentter qatysty.
Buǵan deıin jastar arasynda Prezıdentke senim 91,4%-ǵa jetkenin jazdyq.
