Qazaqstandyqtardyń 95% astamy eldegi etnosaralyq qatynastardy turaqty dep sanaıdy
ASTANA. KAZINFORM – Qazaqstan azamattarynyń 95%-dan astamy eldegi etnosaralyq qatynastardyń ahýalyn turaqty ári qolaıly dep sanaıdy. Bul – 2025 jylǵy áleýmettik saýalnama nátıjesi ǵana emes, sonymen qatar qoǵamdyq kelisimdi nyǵaıtýǵa, etnosaralyq qatynastardy damytýǵa jáne osy baǵyttaǵy memlekettik saıasatqa degen senimdi arttyrýǵa negizdelgen júıeli jumystyń jemisi.
Mádenıet jáne aqparat mınıstrliginiń málimetinshe búginde Qazaqstanda 100-den astam etnos ókilderi beıbitshilik pen ózara kelisim jaǵdaıynda ómir súrip, teń múmkindikter men ornyqty damýǵa negizdelgen Ádiletti Qazaqstandy qurý jolynda bir maqsatqa birigip otyr.
Qazaqstan halqy Assambleıasynyń 30 jyldyǵyn keń kólemde atap ótý – durys baǵytta júrgizilip jatqan saıasattyń taǵy bir dáleli. Mereıtoı aıasynda 3 mıllıonnan astam adam qatysqan 10 myńnan asa áleýmettik mańyzy bar is-shara ótkizildi.
Bul jyl tek mańyzdy oqıǵalarmenǵana emes, ıgi istermen de este qaldy. Máselen, Qazaqstan halqy Assambleıasy janyndaǵy «Jomart jan» ortalyǵynyń metsenattary 35 myń qazaqstandyqqa jalpy somasy 305 mıllıon teńge kóleminde kómek kórsetti.
Etnosaralyq kelisimdi nyǵaıtýǵa baǵyttalǵan memlekettik saıasatty júzege asyratyn tıimdi júıe qalyptasty, ol ortalyq deńgeıden bastap óńirlik assambleıalarǵa deıingi barlyq qurylymdardy qamtıdy.
Etnosaralyq qatynastardyń jaǵdaıyn taldaý jáne naqty usynystar berý maqsatynda óńirlerde turaqty zertteýler júrgizilip, monıtorıngtik issaparlar uıymdastyrylyp jatyr.
Búginde Qazaqstan halqy Assambleıasynyń aıasynda 1000-nan astam etnomádenı birlestik pen 4000 qoǵamdyq qurylym biriktirilgen, olardyń jumysyna 50 myńnan astam adam qatysyp jatyr.
Azamattardy qoǵamdyq ómirge jumyldyratyn «Aqsaqaldar keńesi» men «Analar keńesi» jumys isteıdi, sondaı-aq otbasylyq qundylyqtardy nyǵaıtýǵa jáne jastardyń rýhanı-adamgershilik tárbıesine baǵyttalǵan «Mádenıetti ana – mádenıetti ult», «Adal azamat», «Salaýatty sana» jobalary júzege asyrylýda.
2025 jyly alǵash ret Almaty, Jambyl, Jetisý jáne Túrkistan oblystarynda aýdandyq assambleıalar quryldy.
«Assambleıa jastary» jastar qanatynda 10 myńnan astam jas bar. Olar mádenıetaralyq dıalogty damytýǵa arnalǵan bastamalardy júzege asyrady. Atap aıtsaq, «Jańa tolqyn», «ANK jetekshiler mektebi» jáne «50 jas kóshbasshy» jobalary bar. Elimizdegi joǵary oqý oryndarynda etnos ókilderinbiriktiretin Stýdenttik Assambleıa jumys isteıdi, ol etnosaralyq kelisimdi jáne azamattyq biregeılikti nasıhattaýǵa, sondaı-aq jergilikti jerde volonterlik qyzmet pen etnomedıatsııany damytýǵa úles qosady.
Óńirlerde 32 Dostyq úıi jumys isteıdi, al 2025 jyly Qyzylorda, Atyraý jáne Abaı oblystarynda jańa nysandardyń qurylysy bastaldy.
Ǵylym men bilimdi damytý, sondaı-aq zertteý jumystaryn júrgizý maqsatynda joǵary oqý oryndarynda Assambleıanyń 42 kafedrasy bar. Ǵylymı-eksperttik keńes jáne Jas ǵalymdar klýby jumys isteıdi. Onda 360 sarapshy qyzmet etedi.
Elimizde etnojýrnalıstıka salasy da qarqyndy damyp keledi. Qazaqstanda 11 tilde shyǵatyn 50-den astam etnıkalyq gazet pen jýrnal basylady. 14 ýnıversıtette «Etnosaıası saýattylyq» páni engizildi. Qazaqstan halqy Assambleıasy janyndaǵy Jýrnalıster klýbynda jetekshi buqaralyq aqparat quraldarynyń 500-ge jýyq ókili bar.
Assambleıanyń shyǵarmashylyq ujymdary Assotsıatsııasy quryldy, oǵan 170-ten astam ansambl kirdi. Mádenı is-sharalar kúntizbesi júzege asyrylyp, tórt etnıkalyq teatr jumys istep jatyr.
Qazaqstannyń etnosaralyq kelisim úlgisi halyqaralyq deńgeıde tanyldy. Assambleıa janynan halyq dıplomatııasy ortalyǵy men Dostyq elshileri korpýsy jumys isteıdi, olar Qazaqstannyń beıbitshilik modelin shet elderge tanystyryp jatyr.
«Assambleıa jastary» uıymy ıÝNESKO men Eýropa Keńesiniń halyqaralyq jastar qurylymdaryna kirip, óz bastamalaryn Parıjdegi ıÝNESKO shtab-páterinde tanystyrdy.
Aıta ketelik Qazaqstan halqy Assambleıasynyń 30 jyldyǵyna oraı jalpyulttyq ǵylymı-tájirıbelik konferentsııa ótken edi.