Qazaqstandyqtardyń 9,3 paıyzynda jalǵyz jaqyn dosy bar — saýalnama
ASTANA. KAZINFORM — QR Prezıdenti janyndaǵy Strategııalyq zertteýler ortalyǵynyń bas ǵylymı qyzmetkeri, áleýmettaný ǵylymdarynyń doktory Aıgúl Zabırova «Qazaqstandyqtardyń dostyq baılanystary qanshalyqty berik» degen suraqqa jaýap izdegen saýalnamanyń qorytyndysyn jarııalady.
Siz tyǵyz qarym-qatynas jasaıtyn jáne ózińiz úshin mańyzdy máseleler týraly ashyq sóılese alatyn qansha dosyńyz bar? Saýalnamaǵa tartylǵan adamdarǵa áýeli osyndaı suraq qoıylǵan.
Respondentterdiń 68,5%-y 2-den 9-ǵa deıin dosy bar ekenin aıtqan.
— Bul — dostyq baılanystardyń jetkilikti keń ári belsendi ekenin kórsetedi, — dep jazady ǵalym.
Bulardyń ishinde 31,6% respondent 3-4 jaqyn dosy bar ekenin málim etken. Al 35,2% respondent jaqyn aralasatyn dosynyń sany 5-ten asatynyn kórsetken.
— 10-nan kóp dosy bar respondentter kóbinese Túrkistan, Qyzylorda jáne Atyraý oblystarynan. 5 pen 9 aralyǵynda dosy bar respondentterdiń basym bóligi Astana, Qyzylorda jáne Aqtóbe oblystarynda jıi kezdesedi, — deıdi zertteýshi.
Respondentterdiń 5,7%-y múlde jaqyn dosy joq ekenin aıtsa, taǵy 9,3%-y jalǵyz dos bar ekenin málimdegen.
— Bul — alańdatarlyq, biraq dabyl qaǵarlyq deńgeı emes. Mysaly, AQSh nemese Japonııa sekildi elderde jalǵyzdyq jaǵdaıy áldeqaıda jıi kezdesedi. Degenmen, 0-1 ǵana jaqyn dosy bar 15% respondenttiń bolýy áleýmettik oqshaýlaný, álsiz áleýmettik birigý nemese áleýmettik baılanystardyń úzilýi sııaqty úrdisterdiń bar ekenin kórsetedi. Bul ásirese osal toptar — egde jastaǵylar, mıgranttar men jumyssyzdar arasynda ózekti. Jetisý, Almaty jáne Jambyl oblystarynyń turǵyndary kóbine bir ǵana dosy bar ekenin kórsetken. Al múlde dosy joq respondentter kóbine Jetisý, Shyǵys Qazaqstan jáne Qaraǵandy oblystarynda kezdesedi, — deıdi Aıgúl Zabırova.
Suralǵandardyń shamamen úshten biri (28,9%) 3-4 dosymen aıyna keminde bir ret kezdesedi (Shymkent, Aqmola jáne Pavlodar oblystarynyń turǵyndary). Al 20,1% respondent aıyna keminde bir ret 5-9 dosymen kezdesedi (Shymkent, Qyzylorda, Pavlodar, Aqtóbe, Abaı jáne Batys Qazaqstan oblystarynyń turǵyndary).
Suralǵandardyń 15%-y 5-9 dosynyń qoldaýyna senim artsa (Shymkent, Mańǵystaý jáne Atyraý oblystarynyń turǵyndary), 14%-y 10 jáne odan kóp dosynan qoldaý sezinetinin aıtqan.
Respondentterdiń 31%-y 3-4 dosynan kómek suraı alatynyn, (kóbinese bul Shymkent, Astana jáne Almaty qalalarynyń turǵyndary), 20%-y kómek surap júginetin eki-aq dosy bar ekenin kórsetken (Qaraǵandy, Qostanaı, Shyǵys Qazaqstan oblystary men Astana qalasy), 11%-y senim artatyn jalǵyz dosy bar ekenin moıyndaǵan (kóbinese Qaraǵandy, Soltústik Qazaqstan, Aqmola, Jambyl, Abaı jáne Jetisý oblystarynyń turǵyndary. Sondaı-aq, 8,7% respondent kómek suraı alatyn bir de bir dosy joq ekenin rastaǵan (jalǵyzdyqty eń kóp sezinetinder — Jetisý, Ulytaý, Qaraǵandy jáne Aqtóbe oblystarynyń turǵyndary).
Buǵan deıin Astanada Qazaqstan men Reseıdiń máńgilik dostyq alleıasy ashylǵanyn jazdyq.