Qazaqstandyqtardyń 93 paıyzy eldegi etnosaralyq ahýaldy oń baǵalaıdy
ASTANA. KAZINFORM — Saýalnamaǵa qatysqandardyń 86,8 paıyzy etnosaralyq kelisimdi nyǵaıtýǵa baǵyttalǵan memlekettik sharalarǵa oń baǵa bergen.
Qazaqstanda etnosaralyq kelisimdi, qoǵamdaǵy turaqtylyq pen el birligin nyǵaıtýǵa baǵyttalǵan memlekettik saıasat júıeli túrde júzege asyrylyp keledi.
Memleket basshysy Qasym-Jomart Toqaev óz sózinde etnosaralyq kelisim men birliktiń memlekettik saıasattyń basty basymdyqtarynyń biri ekenin birneshe ret atap ótti. Bul baǵyttaǵy jumystyń negizinde ádildik pen barlyq azamatqa teń múmkindik qaǵıdattary jatyr.
Muny 2026 jyldyń alǵashqy jartyjyldyǵynda júrgizilgen áleýmettik zertteý nátıjeleri de aıǵaqtaıdy. Qoldanbaly etnosaıası zertteýler ınstıtýtynyń málimetinshe, azamattardyń 93,2 paıyzy eldegi etnosaralyq qarym-qatynasty turaqty dep baǵalaıdy. Al respondentterdiń 72,5 paıyzy etnıkalyq tegi boıynsha quqyqtarynyń buzylmaǵanyn aıtqan.
Saýalnamaǵa qatysqandardyń 86,8 paıyzy etnosaralyq kelisimdi nyǵaıtýǵa baǵyttalǵan memlekettik sharalarǵa oń baǵa bergen.
Bıylǵy jyldyń alǵashqy alty aıynda respýblıka boıynsha 5 myńnan astam is-shara ótkizilip, oǵan 140 myńnan astam adam qatysty. Bul jumystarǵa 800-ge jýyq sarapshy, jýrnalıst, bloger jáne etnomádenı birlestikterdiń ókilderi jumyldyryldy.
Búginde Qazaqstanda 130-ǵa jýyq etnos ókili turady.
Elde 1 myńǵa jýyq etnomádenı birlestik pen 4 myńnan astam qoǵamdyq qurylym jumys isteıdi.
Qoǵamdyq kelisimdi nyǵaıtýda «Qoǵamdyq kelisim» KMM men Dostyq úıleri mańyzdy ról atqarady. Qazir elimizdiń óńirlerinde 37 Dostyq úıi jumys istep, qoǵamdyq dıalogty damytýǵa, mádenı-aǵartýshylyq bastamalardy júzege asyrýǵa jáne etnomádenı birlestikterdiń, memlekettik organdar men azamattyq qoǵamnyń birlese jumys isteýine jaǵdaı jasap keledi.
Etnomádenı birlestikterdiń ókilderi barlyq mańyzdy respýblıkalyq bastamaǵa belsene qatysady. Sonyń ishinde «Taza Qazaqstan» respýblıkalyq ekologııalyq aktsııasyna jyl basynan beri 300 myńnan astam adam qosyldy.
Elimizde medıatsııa ınstıtýtyn damytýǵa da erekshe mán berilip keledi. Ár óńirde kásibı medıatorlardy, zańgerlerdi, pedagogterdi, psıhologtardy, dintanýshylardy, jýrnalısterdi jáne qoǵam belsendilerin biriktiretin ortalyqtar men keńester jumys isteıdi. Qazirgi tańda medıatorlar tiziliminde 432 maman tirkelgen.
Aıta ketelik Elimizde 4 myńnan astam qoǵamdyq qurylym etnosaralyq qatynastardy nyǵaıtýǵa úles qosyp keledi.
