Qazaqstandyqtardyń 9,3 mıllıard teńge aıyppuly men ósimpuly keshirildi

Bul týraly Úkimet otyrysynda Qarjy vıtse-mınıstri Erjan Birjanov málimdedi.

Vıtse-mınıstrdiń aıtýynsha, bul shara kásipkerlikti qoldaýǵa baǵyttalǵan «Taza paraq» bastamasy aıasynda iske asqan.

Sondaı-aq jyl basynan beri buryn tirkeý esebinde turmaǵan 546 myńǵa jýyq jeke tulǵa zańdastyryldy.

— Ózin-ózi jumyspen qamtyǵandardy qosa alǵanda, kásipkerlik sýbektileriniń sany 2,9 mıllıonǵa jetti, — dedi vıtse-mınıstr.

Sonymen qatar QQS tóleýshiler sany 22,3 myńǵa kóbeıip, 158,2 myń bolǵan.

— Bul salyq reformasynyń ekonomıkalyq belsendilikti arttyrýǵa yqpal etip otyrǵanyn kórsetedi, — dedi Erjan Birjanov.

Aıta keteıik, buǵan deıin Qarjy vıtse-mınıstri Erjan Birjanov respýblıkalyq bıýdjet kirisi 24,6% óskenin aıtty.