Qazaqstandyqtardyń 87%-y eldiń saıası baǵytyn qoldaıdy

«Face-to-face» formatynda, ıaǵnı betpe-bet suhbat túrinde ótken saýalnamaǵa Qazaqstannyń barlyq óńirinen, sondaı-aq Astana, Almaty jáne Shymkent qalalarynan 18 jastan asqan 8000 turǵyn qatysty.

Qoǵamdyq kóńil-kúıdiń negizgi ındıkatorlarynyń biri — azamattardyń elimizdiń damý baǵytyna bergen jalpy baǵasy. Bul kórsetkish halyqtyń memlekettik saıasatty qabyldaý deńgeıin kórsetedi.

— Zertteý nátıjeleri halyq memlekettiń saıası baǵytyn joǵary deńgeıde qoldaıtynyn aıqyndady. Atap aıtqanda, saýalnamaǵa qatysqandardyń 87,8%-y Qazaqstan durys baǵytta damyp keledi dep kórsetken, — delingen habarlamada.

Azamattyq belsendiliktiń mańyzdy ındıkatory — halyqtyń saılaýda daýys berýge degen yntasy.

Saýalnama júrgizilgen kezde QR Quryltaıynyń saılaýy ótetin kún áli jarııalanǵan joq edi. Sondyqtan respondentterge: «Eger aldaǵy jeksenbide Quryltaı (Parlament) saılaýy ótse, Siz daýys berýge barar ma edińiz?» degen suraq qoıyldy.

— Zertteý nátıjesine sáıkes, azamattardyń basym bóligi aldaǵy Quryltaı saılaýynda daýys berýge daıyn. Respondentterdiń 75,6%-y saılaý ýchaskesine barýǵa nıetti ekenin aıtqan. Onyń ishinde 44,2%-y daýys beretinin naqty atap kórsetse, 31,4%-y daýys berýi yqtımal ekenin jetkizgen, — delingen habarlamada.

Partııalarǵa degen kózqarasty anyqtaý úshin respondentterge: «Eger jaqyn aradaǵy jeksenbide Quryltaı saılaýy ótse, Siz qaı saıası partııaǵa daýys berer edińiz?» degen suraq qoıyldy.

— Saýalnama qorytyndysy boıynsha «Ádilet» partııasy eń joǵary qoldaýǵa ıe bolǵan. Bul partııaǵa respondentterdiń 54,2%-y daýys berýge daıyn ekenin bildirgen. Ekinshi orynda 7,3% kórsetkishpen «Aýyl» partııasy tur. «Aq jol» partııasy 4,6% kórsetkishpen úshinshi orynǵa shyqqan. «Respublica» partııasyn qoldaý deńgeıi 3,4%-dy quraǵan. Jalpyulttyq sotsıal-demokratııalyq partııaǵa saýalnamaǵa qatysýshylardyń 2,4%-y daýys berýge daıyn. Qazaqstan Halyq partııasyn respondentterdiń 2,1%-y qoldaǵan. «Baıtaq» partııasyn saýalnamaǵa qatysýshylardyń 1,1%-y tańdaǵan. «Barlyǵyna qarsymyn» nusqasyn respondentterdiń 2,3%-y belgilegen, — delingen habarlamada.

Sonymen qatar, saılaýaldy úgit-nasıhat barysynda saıası partııalar úshin tartys nysanasy jetkilikti ekeni anyqtaldy — saılaýshylardyń edáýir bóligi óz tańdaýyn áli jasaǵan joq. Zertteý nátıjesine sáıkes, azamattardyń 22,6%-y, ıaǵnı shamamen árbir besinshi saılaýshy qaı partııaǵa daýys beretini jóninde sheshim qabyldamaǵan.

Jalpy, zertteý nátıjeleri qoǵamda eldiń saıası baǵytyn qoldaý deńgeıi joǵary ekenin jáne azamattardyń saılaý protsesine qatysýǵa daıyn ekenin kórsetti.

Іrikteý Qazaqstan Respýblıkasy halqynyń negizgi áleýmettik-demografııalyq sıpattamalaryna, atap aıtqanda turǵylyqty jeriniń túrine (qala/aýyl), jynysy men jasyna qaraı reprezentatıvti. Senimdilik yqtımaldyǵy 95% bolǵan jaǵdaıda iriktemeniń statıstıkalyq qatelik shegi ±1,1%-dan quraıdy.

DATAmetrics kompanııasy bul zertteý nátıjelerin QR Ortalyq saılaý komıssııasynyń 2026 jylǵy 3 shildedegi № OSK-11-07/ZT-K-29 habarlamasy negizinde jarııalap otyr.

Osyǵan deıin «Ádilet» partııasy Quryltaı saılaýyna qatysty málimdeme jasaǵanyn jazǵanbyz.

Sonymen qatar Respublica partııasy saılaýǵa 76 kandıdat usynǵany belgili boldy.

Budan bólek «Aq jol» partııasy 63 kandıdattan turatyn partııalyq tizimdi bekitti.

Sondaı-aq, «Aýyl» partııasy Quryltaı saılaýyna qatysatyn 69 kandıdatty atady.