Qazaqstandyqtardyń 86,7% Prezıdentke senim bildiredi — saýalnama
ASTANA. KAZINFORM — Qazaqstandyqtardyń basym bóligi negizgi memlekettik ınstıtýttarǵa senim bildiredi jáne eldegi jaǵdaıdy oń baǵalaıdy. Bul týraly Qazaqstandyq qoǵamdyq damý ınstıtýty «2026 jyldyń III toqsanyndaǵy qoǵamdyq-saıası jaǵdaıdyń negizgi ındıkatorlary» zertteýinde habarlady.
Instıtýttyń habarlaýynsha, el Prezıdentine degen senim deńgeıi byltyrǵy kórsetkishten 3 paıyzdyq tarmaqqa — 86,7% deıin ósken.
— Senimniń joǵary deńgeıi negizinen engizilip jatqan ózgeristerdiń udaıy qoǵam nazarynda bolýymen baılanysty. Respondentterdiń 65,8%-y Prezıdenttiń bastamalary týraly aqparatty turaqty túrde nemese oqtyn-oqtyn alyp turady. Prezıdent Qasym-Jomart Toqaevtyń birqatar bastamasy, onyń ishinde byltyr Qazaqstan halqyna Joldaýynda aıtylyp, qazirgi ýaqytta is júzinde iske asyrylyp jatqan bastamalary azamattar tarapynan qoldaý taýyp otyr, — dep túsindirdi QQDI.
Úshinshi toqsan qorytyndysy boıynsha eń kóp qoldaý tapqan úsh bastama qataryna — bir palataly Quryltaıǵa kóshý, 2026 jyldy Tsıfrlandyrý jáne jasandy ıntellekt jyly dep jarııalaý, sondaı-aq «Ulttyq qor — balalarǵa» jobasy aıasynda turǵyn úı jaǵdaıyn jaqsartýǵa jáne bilim alýǵa qarajat aýdarý ıdeıalary kirdi.
Tehnologııalyq damý, atom energetıkasy, bilim men ǵylym salasyndaǵy, sondaı-aq «Taza Qazaqstan» aıasynda iske asyrylatyn bastamalar aıtarlyqtaı qoǵamdyq qyzyǵýshylyq týdyryp otyr.
— Osylaısha, qoldaýdyń joǵary deńgeıi el damýynyń jalpy baǵytyna ǵana emes, ınstıtýtsıonaldyq qurylymǵa, jańa tehnologııalarǵa, adamı kapıtalǵa jáne azamattardyń ómir súrý sapasyna qatysty naqty sheshimderge de qatysty bolyp otyr. Jalpy alǵanda, III toqsannyń nátıjeleri memlekettik ınstıtýttarǵa degen senim deńgeıiniń turaqty saqtalǵanyn jáne eldegi ahýaldyń negizinen oń qabyldanatynyn kórsetedi, — deıdi Qoǵamdyq damý ınstıtýty.
Saýalnama 31 shilde men 16 tamyz aralyǵynda júrgizilip, Qazaqstannyń 18 jastan asqan eresek turǵyndarynyń jynysy, jasy, eldi meken túri jáne turǵylyqty óńiri boıynsha qurylymyn kórsetetin ulttyq irikteme negizinde 2 400 respondentti qamtyǵan.
Buǵan deıin Qazaqstannyń Ekonomıkalyq zertteýler ınstıtýty Prezıdent Qasym-Jomart Toqaevtyń Seýlge memlekettik sapary aıasynda eki eldiń eksport-ımport kórsetkishterine sholý jasaǵan edi.
