Qazaqstandyqtardyń 85%-dan astamy Prezıdenttiń armııany reformalaý týraly sheshimin qoldaıdy
ASTANA. KAZINFORM – Qazaqstandyqtardyń 85,7%-y Prezıdent Qasym-Jomart Toqaevtyń Qarýly Kúshterdi reformalaý týraly sheshimin tolyq nemese ishinara qoldaıdy, dep habarlaıdy «Demokratııa ınstıtýty» ǵylymı-zertteý qaýymdastyǵy.
Qaýymdastyq Memleket basshysy qabyldaǵan sharalarǵa qoǵamnyń kózqarasyn anyqtaý maqsatynda 28-29 qyrkúıekte saýalnama júrgizgen.
Zertteý nátıjesine sáıkes, respondentterdiń 85,2%-y Qorǵanys mınıstrliginiń qyzmetine keshendi tekserý júrgizý týraly sheshimdi tolyq nemese ishinara qoldaıdy. Al armııany reformalaý týraly sheshimdi oń baǵalaǵandardyń úlesi 85,7%-dy qurady.
Saýalnama barysynda qatysýshylarǵa armııada qandaı ózgerister qajet degen suraq qoıylyp, birneshe jaýapty tańdaýǵa múmkindik berilgen.
Eń kóp qoldaý tapqan usynys – Qorǵanys mınıstrliginiń ashyqtyǵy men eseptiligin arttyrý. Bul baǵytty respondentterdiń 47,4%-y ataǵan.
Komandalyq quramdy jańartý jáne onyń kásibı deńgeıin kóterýdi 34,3%, qorǵanys salasyndaǵy jemqorlyqqa qarsy kúresti kúsheıtýdi 29,4% qoldaǵan.
– Saýalnama nátıjesi qoǵamnyń armııada jan-jaqty ózgeris kútetinin kórsetedi. Eldiń qorǵanys qabiletin nyǵaıtýmen qatar, jurt áskerı qyzmettiń kúndelikti uıymdastyrylýy da jaqsarǵanyn qalaıdy, – delingen zertteý qorytyndysynda.
Áskerı qyzmetshilerdiń qaýipsizdigi men áleýmettik jaǵdaıyn jaqsartýdy saýalnamaǵa qatysqandardyń 25,3%-y mańyzdy dep sanaıdy. Qarý-jaraq pen áskerı tehnıkany jańartýdy 20,7%, jańa tehnologııalardy, onyń ishinde tsıfrlyq sheshimderdi engizýdi 20,4%, jaýyngerlik daıarlyq pen oqý-jattyǵý deńgeıin kóterýdi 19,2% ataǵan.
Saýalnamany «Demokratııa ınstıtýty» ǵylymı-zertteý qaýymdastyǵy 2026 jylǵy 28-29 qyrkúıekte onlaın-saýalnama (CAWI) ádisimen júrgizgen. Oǵan elimizdiń 17 oblysy men Astana, Almaty jáne Shymkent qalalarynan 18 jastan asqan 1012 respondent qatysqan.
Aıta keteıik, buǵan deıin Prezıdent Qasym-Jomart Toqaev Qarýly Kúshterdi reformalaý josparyn ázirleýdi tapsyrǵan bolatyn. Jospardy Qaýipsizdik Keńesiniń qazan aıyndaǵy otyrysynda qaraý kózdelgen.
