Qazaqstandyqtardyń 83 elde banktik shoty bar
ASTANA. KAZINFORM – QR Qarjy mınıstrligi Memlekettik kirister komıtetiniń Jeke tulǵalardyń kiristerin ákimshilendirý basqarmasynyń basshysy Dına Qusaıynova deklaratsııa tapsyrǵan jeke tulǵanyń 83 eldegi shetel bankterinde shottary bar ekenin aıtty.
Banktik shottar kóbine Reseı Federatsııasynda, AQSh-ta jáne Túrkııada ashylypty.
Sondaı-aq:
- 71 elde 2 976 jeke tulǵa 3 959 jyljymaıtyn múlikke ıelik etedi. Eń kóbi: Reseıde, Túrkııada jáne Bolgarııada;
- 67 elde 1 421 jeke tulǵada 1 657 kólik bar. Eń kóbi: Reseıde, Armenııada jáne Japonııada;
- 21 elde 93 jeke tulǵanyń 161 zııatkerlik menshik nysany bar.
Degenmen, vedomstvo qazaqstandyqtardyń óz aktıvterin durys kórsete bermeıtinin de eske saldy.
«Keıbir azamattar qatelesýi de múmkin. Máselen, Japonııada óndirilgen múlikti sol elde dep kórsetýi ǵajap emes. Bul jerde, sirá, durys túsinbeı, qate toltyryp qoıǵan shyǵar», - dedi D.Qusaıynova.
