Qazaqstandyqtardyń 80% LGBT nasıhatty zańmen shekteýdi qoldaıdy — saýalnama

ASTANA. KAZINFORM — «Strategııa» áleýmettik-saıası zertteýler ortalyǵy respýblıkalyq deńgeıde LGBT nasıhatyna qatysty saýalnama júrgizdi. Onyń qorytyndysy týraly atalǵan ortalyqtyń jetekshisi Olga Sımakova aıtyp berdi.

— Qazir qoǵamda nekeniń eki túri qalypty nárse retinde qabyldanyp jatyr. Soǵan qaramastan, árbir úshinshi azamat otbasylyq qundylyqqa qaýip tóndi dep esepteıdi. Árbir tórtinshi respondent kúndelikti ómirde LGBT úgit-nasıhatyna tap bolǵan. LGBT úgit-nasıhaty aqparattyq keńistikte bar ekenin moıyndaýymyz kerek. Sebebi árbir tórtinshi adam, qalasa da, qalamasa da, jıi nemese sırek bolsa da, kúndelikti ómirde bul taqyryppen betpe-bet keledi, — dedi Olga Sımakova.

Onyń aıtýynsha, adamdar LGBT nasıhaty týraly neǵurlym kóbirek bilse, qoǵamda ashyq nemese jasyryn úgit-nasıhattyń bar ekenin soǵurlym jıi aıtady.

— Qazaqstandyqtardyń 10-nan 7-i LGBT nasıhatty qaýipti dep sanaıdy. Zertteýge qatysqan respondentter LGBT taqyrybyna qatysty kontentke alańdaýshylyq bildirdi. Respondentterdiń 80%-y LGBT nasıhatqa zańmen shekteý qoıýdy qoldaıdy. Dástúrli qundylyqtar men balalardy qorǵaý jónindegi ýájder keń qoldaý tapty, ásirese er azamattar, otbasyly adamdar jáne orta arnaýly bilimi bar azamattar qoldap otyr. Biz óz zertteýimiz aıasynda mynadaı suraq qoıdyq: «Qazaqstandyq jastar úshin LGBT úgit-nasıhaty qaýip tóndire me? nátıjesin kórip otyrsyzdar, saýalnamaǵa qatysqandardyń deni nasıhattyń ósip kele jatqany urpaq úshin belgili bir deńgeıde qaýipti ekenin moıyndady. Olardyń árbir tórtinshisi qaýiptiń joǵary deńgeıde ekenin atap ótti. Demek, bul taqyrypqa qatysty qoǵamda qorqynysh pen alańdaýshylyq bar degen qorytyndy jasaýǵa bolady. Jas urpaqqa tónetin qaýip bar ekeni negizinde mundaı nasıhatty shekteý nemese tyıym salý týraly argýment qoǵamda kópshiliktiń qoldaýyna ıe ekenin jáne ómirsheń ekenin kórsetip otyr, — dep tolyqtyrdy ortalyq basshysy.

Aıta keteıik, búgin elordada LGBT nasıhattyń balalar men jasóspirimderge áserin zertteý nátıjesi talqylandy. Atalǵan sharaǵa sarapshylar, ǵalymdar, memlekettik organdar ókilderi, depýtattar men qoǵamdyq uıymdar ókilderi qatysty.

Buǵan deıin Qazaqstanda LGBT nasıhatqa qylmystyq jaýapkershilik engizý usynysy týraly jazǵan edik.

Sondaı-aq Májilis depýtaty Edil Jańbyrshın LGBT nasıhattyń 73 paıyzy áleýmettik jeliden tarap jatqanyn aıtyp, dabyl qaqty.