Qazaqstandyqtardyń 79,3%-y eldegi jaǵdaıǵa oń baǵa berdi
ASTANA. KAZINFORM — Qazaqstandyqtardyń basym bóligi eldegi ahýaldy turaqty ári qolaıly dep baǵalaıdy. Qazaqstandyq qoǵamdyq damý ınstıtýty saýalnamasyna qatysqandardyń 79,3%-y eldegi jaǵdaıǵa oń baǵa bergen, al 83,6%-y óz ómirine qanaǵattanatynyn aıtqan.
Qazaqstandyq qoǵamdyq damý ınstıtýty (QQDI) júrgizgen toqsan saıynǵy saýalnama nátıjesi áleýmettik optımızmniń joǵary deńgeıi saqtalyp otyrǵanyn kórsetedi. Azamattardyń basym bóligi eldegi jaǵdaıdy oń baǵalap, óz ómirine kóńili tolatynyn, jaıly emotsıonaldyq kóńil-kúıde ekenin jáne aldaǵy bir jylda otbasy jaǵdaıy jaqsaratynyna senetinin bildirgen.
QQDI-nyń bıylǵy jyldyń ІІІ toqsanyndaǵy zertteýine sáıkes, qoǵamdyq kóńil-kúıde eldegi ahýaldy oń qabyldaý basym. Respondentterdiń 79,3%-y Qazaqstandaǵy jaǵdaıdy qolaıly jáne turaqty dep sıpattaǵan. Bul kórsetkish ótken jyldyń osy kezeńimen salystyrǵanda 1,7%-ǵa artty.
— Ekonomıkalyq ahýalǵa qatysty da oń kózqaras basym. Saýalnamaǵa qatysqandardyń 72,9%-y eldiń ekonomıkalyq ahýalyna jaqsy baǵa bergen. ıAǵnı, árbir on respondenttiń jetiden astamy onyń qazirgi jaı-kúıin qolaıly dep sanaıdy, — dep habarlady ınstıtýttan.
Eldegi ahýaldy jaqsy qabyldaý úrdisi azamattardyń óz ómirin joǵary baǵalaýymen ushtasyp jatyr. Qazaqstandyqtardyń 83,6%-y óz ómirine rıza ekenin bildirgen.
Osyǵan uqsas jaǵdaı kúndelikti emotsıonaldyq kóńil-kúıde de baıqalady. Saýalnamaǵa qatysqandardyń jalpy 88,1%-y sońǵy kúnderi kóńil-kúıi keremet jáne ornyqty ekenin jetkizgen. Atap aıtqanda, zertteýge qatysýshylardyń 27,6%-y óz kóńil-kúıin tamasha dep baǵalasa, taǵy 60,5%-y qalypty ári birqalypty dep sıpattaǵan. Respondentterdiń basym kópshiliginde saýalnama júrgizilgen sátte kóńil-kúıi jaǵymdy jáne qalypty emotsıonaldy jaǵdaıda ekenin atqan.
— Otbasynyń materıaldyq jaǵdaıyn baǵalaý kezinde saýalnamaǵa qatysqandardyń 69,1%-y otbasylyq tabystyń saqtalǵanyn nemese óskenin aıtqan, bul kóptegen otbasylardyń materıaldyq jaǵdaıy negizinen turaqty ekenin kórsetedi, — delingen habarlamada.
Buǵan deıin oryn alǵan ózgerister de negizinen oń baǵalanyp otyr. Respondentterdiń jartysyna kóbi (49,5%) sońǵy bir jylda óz ómiri men otbasynyń ál-aýqaty jaqsardy dep esepteıdi.
Jaǵymdy ózgeristerdi kóbine jastar sezingen. 18 ben 28 jas aralyǵyndaǵy respondentterdiń 57,7%-y, al 29 ben 45 jas aralyǵyndaǵy qatysýshylardyń 50,6%-y ómiriniń jaqsarǵanyn málimdegen. Osy jas sanattaryndaǵy azamattardyń basym bóligi úshin ótken jyl jeke jáne otbasylyq ómirdegi jaǵymdy ózgeristermen este qalǵan.
Jaqyn bolashaqty baǵalaýda da optımıstik kózqaras basym. Qazaqstandyqtardyń jartysynan kóbi (56,6%) bir jyldan keıin ózderi men otbasylary qazirgiden de jaqsy ómir súredi dep senedi.
Mundaı úmitti kóńil-kúı qala halqyna da, aýyl turǵyndaryna da tán. Bul rette aýyldyq jerlerde bul kórsetkish anaǵurlym baıqalady: aldaǵy bir jyl ishinde ómiriniń jaqsaratynyna aýyl turǵyndarynyń 61,9%-y jáne qalalyqtardyń 53,4%-y senedi.
Jalpy alǵanda, zertteý nátıjeleri eldegi jaǵdaıdy oń baǵalaý men jeke turmysqa qanaǵattanýdyń joǵary deńgeıi jáne azamattardyń edáýir bóliginiń jaqyn bolashaqqa degen senimi bir-birimen úılesim taýyp otyrǵanyn kórsetedi. Qoǵamdyq kóńil-kúı tek aǵymdaǵy ahýaldy baısaldy qabyldaýmen ǵana emes, sonymen birge óz ómiri men otbasy jaǵdaıyndaǵy budan da arǵy jaǵymdy ózgeristerden úmit kútýimen erekshelenedi.
Mundaı baǵalaýlar jıyntyǵy eldiń damýyn qabyldaý kúndelikti ómirdegi turaqtylyq sezimimen jáne bolashaqqa degen oń kózqaraspen nyǵaıtylatyn berik áleýmettik negiz qalyptastyrady.
Saýalnama 31 shilde men 16 tamyz aralyǵynda júrgizildi. Oǵan elimizdiń 18 jastan asqan eresek turǵyndarynyń jynysy, jasy, eldi meken túri men óńirlik qurylymyn tolyq qamtıtyn ulttyq irikteý boıynsha 2 400 respondent qatysty. Іrikteýdiń shekti qateligi 95% senimdilik yqtımaldyǵy kezinde ±2%-dan aspaıdy.
Aıta keteıik, qazaqstandyqtardyń 76,8%-y «Zań men Tártip» qaǵıdatyn qoldaıdy.
