SQO-da kásipkerler logıstıka shyǵynynyń kóbeıgenine shaǵymdandy
PETROPAVL. KAZINFORM — Soltústik Qazaqstan oblysy «Qyzyljar» arnaıy ekonomıkalyq aımaǵyndaǵy (AEA) kásipkerler óndiristi keńeıtýge kedergi keltirip otyrǵan birqatar ınfraqurylymdyq jáne ákimshilik máselelerdi kóterdi.
SQO kásipkerler palatasynyń málimetinshe, qazir AEA aýmaǵynda 21 kásiporyn jumys isteıdi. Logıstıkalyq ınfraqurylymnyń joqtyǵynan 9 kásiporyn óz ónimderin jeke temirjol tuıyqtaryna avtokólikpen jetkizip, keıin qaıta tıeýge májbúr.
Aǵashty tereń óńdeýmen aınalysatyn zaýyt basshysy Rýstam Ǵabbasovtyń aıtýynsha, kásiporyn DSP jáne otyn túıirshikterin shyǵarady, daıyn ónim Eýropaǵa jóneltilip jatyr.
— Qazir jeke tuıyqty jáne kólik kompanııasynyń qyzmetin paıdalanamyz. Ónimdi tuıyqqa aparyp, sol jerde qaıta tıep, ári qaraı jóneltemiz. Aıyna 20 vagon jibersek, kólik kompanııasynyń qyzmetine shamamen 60 mln teńge jumsalady. ıAǵnı bir vagondy Eýropaǵa jóneltý úshin logıstıkaǵa 3 mln teńgege deıin ketedi. Eger vagonda 25 mln teńgeniń ónimi bolsa, onyń shamamen 10% tıeý, tasymaldaý jáne qaıta tıeýge jumsalady, — dedi Rýstam Ǵabbasov.
Kásipkerlerdiń aıtýynsha, Petropavldaǵy magıstraldyq temirjol jelileri «Reseı temir joldary» AAQ-nyń Ońtústik Oral temirjoly fılıalynyń qaramaǵynda. AEA aýmaǵyna temirjol tarmaǵyn qosý úshin tehnıkalyq sharttardy kelisip, memleketaralyq rásimderden ótý kerek. Sondaı-aq uzyndyǵy 2,3 km jol qurylysyna qajetti jeke jer telimderin satyp alý máselesin sheshý qajet.
Osyǵan baılanysty jergilikti kásipkerler 21 kásiporynnyń árqaısysy jeke-jeke RJD-ǵa júginbeı, máseleni Úkimet deńgeıine shyǵarýdy surap otyr.
Kásipkerler úshin taǵy bir ózekti másele — AEA aýmaǵyna kiretin avtokólik joldarynyń bolmaýy. Keıbir óndiris oryndaryna aýyr júk kólikteri jete almaıdy.
Aýyl sharýashylyǵy tehnıkasyna arnalǵan tirkemeler shyǵaratyn zaýyt, sondaı-aq jeńildetilgen qarjyǵa qol jetkize almaı otyr.
Kásiporyn basshysy Olga Veldıaksovanyń aıtýynsha, zaýyt qurylysy 2022 jyly bastalyp, 2024 jyly tolyq óndiristik tsıkl iske qosylǵan. Kásiporyn óndiristi keńeıtip, jańa jabdyq satyp almaq bolǵan. Alaıda qarjylandyrý talaptarynyń ózgerýi bul josparǵa kedergi keltirgen.
— Biz «Ónerkásipti damytý qory» arqyly 500 mln teńgege jabdyq alýǵa ótinim bergimiz kelgen. Biraq keıin talaptar ózgerip, mashına jasaý salasyndaǵy qor 1 mlrd teńgeden bastalatyn iri jobalardy ǵana qarjylandyratyny aıtyldy. Sondyqtan bizdi ekinshi deńgeıli bankterge jiberdi. Al bankter úsh jyldyq qarjylyq esepti talap etedi. 2022-2023 jyldary zaýyttyń ózi salynyp jatqanyn eskermeıdi. Sonyń saldarynan kásiporyn shyǵyndy retinde baǵalanyp, bári nesıelendirýden bas tartyp jatyr», — dedi Olga Veldıaksova.
Onyń aıtýynsha, kepil máselesi de bar. Zaýyt ornalasqan jer AEA aýmaǵynan 2044 jylǵa deıin jalǵa alynǵandyqtan, bankter ǵımaratty kepil retinde qabyldaýǵa saqtyq tanytyp otyr.
— Bizge qazir metall tabaqtaryn tazartýǵa arnalǵan qondyrǵy qajet. Biraq ony nesıege alý múmkin bolmaı, jabdyqty óz aqshamyzǵa satyp alýǵa týra kelip otyr.
Zaýytqa 2 mlrd teńgeden astam ınvestıtsııa saldyq. Sondyqtan óndiristi keńeıtýge qajetti jabdyqty alýǵa qandaı da bir qoldaý bolsa deımiz. Qarjy uıymdary qurylys kezeńi men naqty óndiris kezeńin ajyratyp qaraýy kerek, — dedi kásiporyn basshysy.
Jınaqtalǵan usynystardy «Atameken» UKP-nyń beıindi departamenti Úkimet pen tıisti mınıstrlikterdiń qaraýyna shyǵarmaq.
Buǵan deıin SQO kásipkerleri óndiristi damytýdaǵy negizgi máselerdi tizip bergenin jazǵan edik.
