Qazaqstandyqtardyń 73,7%-y tabysy men shyǵysyn esepke alady - zertteý
ASTANA. KAZINFORM – Qazaqstandyqtardyń 73,7%-y jeke tabystary men shyǵystaryn belgili bir deńgeıde esepke alyp otyrady. Bul týraly Qazaqstandyq qoǵamdyq damý ınstıtýtynyń zertteýinde aıtyldy.
Zertteý nátıjesine sáıkes, respondentterdiń 34,9%-y barlyq qarjylyq operatsııalaryn júıeli túrde tirkeıdi. Al 38,8%-y tabysy men shyǵysyn shamamen eseptep otyratynyn kórsetken.
«Saýalnamaǵa qatysqandardyń 73,7%-y jeke qarjysyn belgili bir deńgeıde baqylap otyrady. Onyń ishinde 34,9%-y barlyq qarjylyq operatsııalardy turaqty túrde tirkese, 38,8%-y shamamen esep júrgizedi. Sonymen qatar respondentterdiń 17,1%-y shyǵystaryn múlde baqylamaıtynyn aıtsa, 6,9%-y mundaı esep júrgizýdi qajetsiz dep sanaıdy», – delingen zertteý qorytyndysynda.
Sarapshylardyń aıtýynsha, qarjylyq tártipke otbasy jaǵdaıy da áser etedi.
Atap aıtqanda, kámeletke tolmaǵan balalary bar respondentterdiń 78,7%-y tabysy men shyǵysyn turaqty nemese ishinara esepke alady.
Al balalary joq azamattar arasynda bul kórsetkish 70%-dy quraǵan.
Zertteý avtorlarynyń pikirinshe, jaqyndary aldyndaǵy qarjylyq jaýapkershilik otbasylyq bıýdjetti sanaly túrde basqarýǵa yqpal etetin mańyzdy faktorlardyń biri bolyp tabylady.
Aıta keteıik, buǵan deıin Qazaqstanda orta tap uǵymy ózgerip jatqany týraly maqala jaryq kórgen bolatyn.
