Qazaqstandyqtardyń 73%-y elimiz durys baǵytta damyp jatyr dep sanaıdy – saýalnama

Qazaqstannyń strategııalyq zertteýler ınstıtýty júrgizgen saýalnama nátıjesine sáıkes, azamattardyń 73,3 paıyzy elimiz durys baǵytta damyp keledi dep esepteıdi. 

Memlekettik bastamalardy qoldaýdyń eń joǵary deńgeıi jastar arasynda –18-29 jas aralyǵyndaǵy respondentterdiń 82%-y qoldaǵan. Bir qyzyǵy, erlerge (71,1%) qaraǵanda áıelder eldiń damýyna (75,3%) optımıstik kózqaras bildirip otyr.

— Qoǵamdyq kóńil-kúıdiń mańyzdy kórsetkishi — halyqtyń el Prezıdentine degen senimi. Qoǵamdyq pikirdi zertteý nátıjesi boıynsha el halqynyń 76,4% Memleket basshysyna senim bildirdi. Prezıdentke degen senimniń joǵary deńgeıi jastar arasynda — 84,6%, áıelder arasynda — 78,1% (erlerde — 74,5%) baıqaldy. Aýyl jáne qala turǵyndarynyń senim deńgeıinde eleýli aıyrmashylyq baıqalmaıdy, tıisinshe 76,8% jáne 76,1%, — delingen Qazaqstannyń strategııalyq zertteýler ınstıtýty habarlamasynda.

Bul rette respondentterdiń jartysynan astamy — 60,8% eldiń aldaǵy bes jyldaǵy damý bolashaǵyn «óte durys» jáne «edáýir durys» dep baǵalaıdy.

Bul áleýmettik optımızm ómirge qanaǵattaný sııaqty qoǵamdyq kóńil-kúıdiń kórsetkishinde de kórinedi. «Jalpy, siz óz ómirińizge qanshalyqty qanaǵattanasyz?» degen suraqqa respondentterdiń 57,3%-y «tolyǵymen qanaǵattanamyn» dep eseptese, 32,8%-y «edáýir qanaǵattanamyn» dep jaýap bergen.

Sondaı-aq respondentter eldiń saıasaty, ekonomıkasy jáne qoǵamdyq ómiri týraly aqparatty jelilik BAQ-tan (30,3%) jáne áleýmettik jelilerden (34,7%) alǵandy jón kóretinin atap ótti.

18 jastan asqan 8 myń respondent qatysqan zertteý 17 oblys pen respýblıkalyq mańyzy bar 3 qalany qamtydy. Saýalnama 2025 jyldyń 20 naýryzy men 20 sáýiri aralyǵynda halyqtyń áleýmettik-demografııalyq qurylymyn kórsetetin irikteý boıynsha jeke suhbattardy (CAPI) paıdalana otyryp júrgizildi. 

Aıta ketelik oqýshynyń kitapty qanshalyqty jıi ashatynyn saýalnama arqyly anyqtaýǵa bolady.