Respondentterdiń 72,3%-y jańa Quryltaı úshin daýys berýge daıyn
ASTANA. KAZINFORM — Qoǵamdyq saıasat ınstıtýty júrgizgen saýalnama nátıjesi 2026 jylǵy 23 tamyzda ótetin Quryltaı saılaýy týraly halyqtyń habardar bolý deńgeıi joǵary ekenin kórsetken.
Zertteý derekterine sáıkes, respondentterdiń 89,4% aldaǵy saılaý týraly habardar («Siz 2026 jylǵy 23 tamyzda Quryltaı saılaýy ótetini týraly bilesiz be?»): 55,2% saılaý týraly tolyq habardar ekenin, taǵy da 34,2% saılaý týraly estigenin, biraq egjeı-tegjeıli bilmeıtinin málimdedi.
Quryltaı saılaýy týraly habardar bolý deńgeıi respondentterdiń jas ereksheligine tikeleı statıstıkalyq táýeldi ekeni baıqalady: respondenttiń jasy ulǵaıǵan saıyn onyń saılaý týraly habardar bolý deńgeıi de arta túsedi. Saılaý týraly habardar bolý deńgeıi aýyl turǵyndary arasynda joǵary.
Áleýetti elektoraldy belsendilik kórsetkishi de azamattardyń daýys berýge daıyndyq deńgeıiniń joǵary ekenin kórsetedi. Zertteý nátıjelerine sáıkes, respondentterdiń 72,3% Quryltaı saılaýyna qatysýǵa nıetti ekenin málimdedi («Siz 2026 jylǵy 23 tamyzda ótetin Quryltaı saılaýynda daýys berýdi josparlap otyrsyz ba?»). Sonymen qatar, respondentterdiń 11,9% daýys berýge qatysýdy josparlamaıtynyn málimdedi. Al 15,8% áli naqty sheshim qabyldamaǵan, onyń ishinde jaýap berýge qınalǵan respondentterdiń 0,5%-y bar.
Áleýetti elektorattyń basty erekshelikteriniń biri onyń sabaqtastyǵy bolyp otyr. Atap aıtqanda, saılaýǵa qatysýǵa nıetti respondentterdiń 87,6% 2026 jylǵy 15 naýryzda ótken jańa Konstıtýtsııany qabyldaý jónindegi respýblıkalyq referendýmǵa da qatysqan («Siz tómende kórsetilgen saılaý naýqandarynyń qaısysyna qatystyńyz/daýys berdińiz?»). Bul eldegi negizgi saıası naýqandarǵa únemi qatysatyn azamattardyń turaqty toby qalyptasqanyn kórsetedi.
Saılaýǵa qatysýǵa nıetti azamattardyń elektoraldyq tańdaýy boıynsha «Ádilet» partııasy alda keledi. Atalǵan partııaǵa respondentterdiń 67,3% daýys berýge daıyn ekenin bildirdi («Siz Quryltaı saılaýynda qaı partııaǵa daýys beresiz?»). Partııany qoldaý deńgeıi 36-60 jastaǵy respondentter, aýyl turǵyndary arasynda joǵary ekeni baıqalady. Atap óterligi, osy partııany qoldaıtyndar saılaýǵa qatysýǵa nıetti respondentter arasynda shoǵyrlanǵan.
Ekinshi orynǵa 6,2% nátıjesimen «Aýyl» partııasy ornalasty. Ári qaraı «Respublica» — 5,5%, «Aq jol» — 4,8%, JSDP — 4,3%, QHP — 3,9%, «Baıtaq» — 1,1% kórsetkishterimen jaıǵasty.
Al respondentterdiń 1,6% barlyq partııalarǵa qarsymyn dep daýys berýdi nıet etse, 5,3% áli sheshim qabyldamaǵanyn aıtty.
Taldaý nátıjeleri partııany tańdaýǵa yqpal etetin negizgi faktor («Joǵaryda kórsetilgen partııalardyń birine daýys berýińizge negizgi sebep qandaı?», respondenttiń birneshe jaýap nusqasyn tańdaý múmkindigi boldy) — onyń bastamalaryna beriletin oń baǵa ekenin kórsetti, bul jaýaptyrespondentterdiń 44,4% tańdaǵan, ekinshi orynda — respondentterdiń belgili bir partııamen turaqty baılanysty sezinýi («Men — osy partııanyń jaqtasymyn» — 29,2%). Odan keıin «Qazaqstannyń keleshegi osy partııamen baılanysty» (25,3%) jáne «Partııanyń saılaýshylarmen jumys isteý tásili maǵan unaıdy» (14,7%) degenpikir jıi kezdesedi.
Jalpy alǵanda, zertteý nátıjeleri azamattardyń aldaǵy Quryltaı saılaýyna degen yntasynyń joǵary deńgeıde ekenin jáne elektoraldyq jumyldyrýdyń jetkilikti dárejede qalyptasqanyn kórsetedi.
Saýalnamany Qoǵamdyq saıasat ınstıtýty 2026 jylǵy 7-27 shilde aralyǵynda ulttyq reprezentatıvti irikteme negizinde júrgizdi. Іrikteme kólemi — 18 jastan asqan 8000 respondent (17 oblys, Astana, Almaty, Shymkent qalalary). Іrikteme qateligi — ±1,19%. Derekterdi jınaý ádisi — jappaı saýalnama (face-to-face). Qoǵamdyq saıasat ınstıtýty derekterdi QR «Qazaqstan Respýblıkasyndaǵy saılaý týraly» Konstıtýtsııalyq zańyna sáıkes QR Ortalyq saılaý komıssııasyn 2026 jylǵy 4 shildedegi № KQ--26/14 jazbasha habardar etý negizinde jarııalaıdy.
Eske sala keteıik, el aýmaǵynda ýchaskelik saılaý komıssııalary jumysyna kiristi.
