Qazaqstandyqtardyń 41 paıyzy ǵana Kóshpendiler oıynynan habardar
ASTANA. KAZINFORM — 8-13 qyrkúıek aralyǵynda Astanada Dúnıejúzilik kóshpendiler oıyny ótetinin bilesiz be? Qoǵamdyq saıasat ınstıtýty shilde aıynda ótkizgen saýalnamada halyqqa osy suraqty qoıyp kórdi. Qatysqandardyń 41,4 paıyzy bıyl Astanada osyndaı alaman ótetinin biletin bolyp shyqty.
Kóshpendiler oıynynyń tarıhy 2014 jyldan bastalady. Alǵash ret Qyrǵyzstanda aımaq sheńberinde bastalǵan jarys búginde álemdik deńgeıdegi iri ári bedeldi halyqaralyq sport jáne mádenı sharalardyń birine aınalyp otyr.
Dúnıejúzilik kóshpendiler oıyny ıÝNESKO-nyń materıaldyq emes mádenı mura tizimine kiredi.
Eń alǵash oǵan 19 elden 10 sport túri boıynsha 583 sportshy qatysqan bolsa, bıyl 89 el, 21 sport túrinen 2500-den astam qatysýshy keledi.
Dúnıejúzilik oıyndy ótkizý quqyǵy Qazaqstanǵa berilgen soń qatysýshy elderdiń tizimi de uzardy.
Bir qyzyǵy, oǵan kóshpeli emes elderden de komandalar qatysady. Al, osy oıyndardy tamashalaýǵa Astanaǵa 100 myńǵa jýyq týrıst keledi degen boljam bar.
21 sport túri boıynsha barlyǵy 97 medal sarapqa salynady. Jeńimpazdarǵa arnalǵan syıaqy kólemi 253 mln teńgeden asady. Ár sport túrinen júlde jeke tabystalady.
Komandalyq sport túrleri boıynsha jeńimpazdarǵa 10 mln teńge, al jeke sport túrlerinen jeńgenderge 500 myń teńge beriledi.
Ulttyq sport oıyndarynan eń kóbi at ústindegi jarystar — kókpar, kók bóri, jamby atý, teńge ilý, báıge, aýdaryspaq.
Osy dodalarda júlde de kóp: báıge jeńimpazyna 2 mln teńge, jorǵa, qunan báıge, top báıgege 3 mln teńgeden, alaman báıgede 5 mln teńgeden beriledi.
At sportynan basqa kúres túrleri, zııatkerlik oıyndar, jekpe-jek, dástúrli sadaq atý, qus salý jáne halyq oıyndarynan da jarystar ótedi.
Dúnıejúzilik kóshpendiler oıyny 6 nysanda ótpek: «Astana-Arena» stadıony, «Qazanat» ıppodromy, J. Úshkempirov atyndaǵy Jekpe-jek saraıy, «Alaý» muz aıdyny saraıy, «Qazaqstan» jeńil atletıka sport kesheni jáne «Dýman» kesheni.
Oıynnyń ashylýy men jarystarǵa bılet satylymǵa shyqty.
